Pampublikong WiFi sa Benguet, bukas para sa publiko 24/7

November 25, 2017 Provincial

LA TRINIDAD, BENGUET – Inilunsad noong Martes (November 21) ang kauna-unahang pambublikong WiFi sa probinsya ng Benguet upang pagandahin at pabilisin ang koneksyon sa internet ng mga subscriber ng Smart at PLDT.

Ang 10 WiFi hotspots na may speed na 96 megabytes per second (mbps) ay ikinabit sa loob ng kapitolyo at laging bukas para sa lahat 24 oras.

Ayon kay Benguet Governor Cresencio Pacalso, matagal nang pangarap ng probinsya na makabitan sila ng pampublikong WiFi upang may magamit and mga estudyante para sa kanilang mga aralin.

Ayon sa gobernador, maraming estudyante partikular na sa La Trinidad ang makikinabang dahil makakatipid sila sa kanilang gastos sa internet shop.

Aniya, maraming estudyante ang nagpupunta sa provincial library upang gumawa ng kanilang assignment.

“Malaking bagay ito sa mga estudyante dahil may libreng trenta minutos na access sa WiFi kada araw. Kaya imbes na pupunta sila sa computer shop ay maaari na silang magtungo rito para gumawa ng kanilang research,” ani Pacalso.

Para makakonekta, hanapin ang Google explorer at i-type ang cellphone number para makatanggap ng pin na siyang gagamitin para makapag-subscribe ng 30 minutong internet access. Kung sakaling kulangin ang 30 minutong access ay maaaring bumili ng P20 o P50 cellcard load para maituloy ang paggamit ng internet. Sa P20 load ay may dalawang oras na na internet browsing at 10 oras naman sa P50 load.

Bagamat hindi pinagbabawalan ang mga empleyado ng kapitolyo na makigamit sa WiFi sa oras ng trabaho, hiningi ng gobernador na gamitin lang sana ito sa may kinalaman sa trabaho.

Samantala, sinabi ni Louie Metra, relations manager ng PLDT sa Cordillera, na ang ikinabit na WiFi sa kapitolyo ay katulad din ng mga nasa airport. Mula sa pinagkabitan ay makakakuha pa ng mabilis na signal ang nasa 100 metrong layo. Nasa 96 hanggang sa 100 mbps naman ang bilis nito.

“Ito ay parte pa rin ng promotion namin pero higit sa lahat ay gusto rin namin na bigyan ng pagkakataon ang mga tao na ma-experience ang aming Smart WiFi,” ani Metra.

Sa ngayon ay hinihintay din ng bayan ng La Trinidad na maikabit ang kanilang public WiFi. Maliban sa kanila, nakahanda na ring malagyan ang Burnham Park at Mines View Park sa lungsod ng Baguio. DIONISIO DENNIS JR. / ABN