Panagbukar dagiti sabsabong

January 28, 2019 Sirmata ken Tagtagainep ni Mang Gusting

Naimbag nga aldaw tayo manen kakailian, kaarruba, gagayyem ken saan a gayyem, hehehee, unayen Kayong Angkuan ta uray saanen a gagayyem. Marikna yo kadi met ti lammin a marikrikna wenno mapaspasaranmi ita ditoy siudad ti saleng? Tumapogen ti bulan dagiti puso a kunada kakayong. Mangrugi metten ti kunada a Flower Festival wenno Panagbenga ditoy siudad ti Baguio. Ania man ngatan dagiti maidasar a putahe wenno event iti makabulan a selebrasyon?

Manun a tawen ti napalabas sipud nainaw ti flower festival wenno Panagbenga ditoy siudad ti Baguio. Adu a turista ti sumang-sang-at, lokal ken gangannaet, mapno amin a hotel, inn agraman boarding house ken transient house. Malaksid iti nagduduma nga event, adu met ti mabalin a pagpasiaran ditoy siudad ti Baguio a parke wenno tourist spot kas koma iti famous a Lourdes Grotto, former a Diplomat Hotel a no sadino ket masarakan ti Daan a Hotel, ken pakasarakan metten iti Guinness book of records holder a largest wenno biggest Ten Commandment Tablet in the World; Burnham Lake, PMA, Mines View Park, Mansion House, Wright Park ken dadduma pay kas met iti strawberry farm idiay La Trinidad, Benguet nga isu ti maysa a ranrantaen dagiti turista.

Maysa kadagiti kangrunaan nga event ket isu ti makuna nga Street Dancing ken Float Parade, ti Session in Bloom a no sadino ket maiserra ti Session road a kangrunaan a kamino real ti siudad ken makuna a central business district ti siudad. Malaksid kadagitoy, ania pay ti makuna nga intay met maidasar pay kailian mi a taga-Baguio? Iti baet dagitoy a napipintas a pasken wenno event iti siudad iti dayta a tiempo, adu met dagiti makuna a negatibo a madillaw tayo, kangrunaan ti nakaro a traffic a mapaspasaranen ita…kasanunto la ngatan no agdudupodop ti tattao iti siudad. Ti kadi nakaro a traffic ti intay ipasarabo kadagiti bisita tayo?

Malaksid iti daytoy a parikut ket isunto manen ti ginabsuon a basura. Namnamaen tayo, siento por siento la ketdi dayta. Bisita man wenno mismo nga agindeg ditoy, adu latta dagiti makuna a nakurang ti panunotna wenno awan pay ket ngata ti panunotda ta kayariganda ti baboy nga agrugit lattan iti uray sadino dita. Ngem kangrunaan a parikut nga intay namnamen ket ti sobra a trapik na, Kayong, isu a dimon pagluganan ti modelo a kotsem ta parikutmunto met laeng, nasaysayaat payen no tay motorsiklom ti pagluganam ta nalaklakam ti sumingit-singit wenno ag-bus ka laengen ta nayonam iti pagpagnam, hahaha.

Ala, kailian saan koma a dagitoy ti mangupay kenka a di umay, Kayong Angkuan. Ibagbagami dagitoy tapno addan pakpakauna kadakayo ta dikayto ket agbabawi no nalaus a trapik ti masungadanyo. Maysa pay nga isyu ita ket dagiti makuna a kangrunaan nga access road nga agturong iti siudad, ta manu bulanen a naiserra ti Kennon Road a kangrunaan a kalsada a dumanun ditoy siudad. Ngem sapay la koma ta malukatan kadagiti motorista
tapno saan unay a nairut ti trapiko iti Marcos Highway nga isu ti maysa nga alternate road malaksid iti Naguilian Road.

Opssss, kakayong, naimasantayo manen ti nagsasarita ket ne, amangan no kita-kitaennak manen ni editor. Ala kastan kakayong, agingga iti sumaruno manen nga intay panagiinnistoria, babayooo tsuptsup muahmuah.