PANGGEP TI BFP ILOCOS SUR A TULADEN TI ZERO FIRECRACKER INCIDENTS IDI 2023 PARA ITI 2024 HOLIDAYS

December 21, 2024 Headlines

VIGAN CITY, Ilocos Sur

Ikagumaan ti Bureau of Fire Protection (BFP) iti Ilocos Sur ti zero nga insidente a mainaig iti firecracker bayat ti
selebrasion ti Paskua ken Baro a Tawen 2024, kalpasan ti naballigi a kampania idi 2023 a nangibunga iti zero incidents. Daytoy ti imbaga ni Fire Officer Franklin L. Calica ti BFP-Ilocos Sur Provincial Headquarters iti maysa nga
interbiu. Pinalagipan pay ni Calica ti publiko a masapul ti panagannad ken agbalin a responsable bayat ti
pananakarmbakda kadagiti piesta.

“Inyusuatmi ti “Oplan Paalala: Iwas Paputok,” maysa nga advocacy campaign a sadiay inaldaw nga ag-round dagiti firetruck-mi tapno maipalagip iti publiko nga agsanay kadagiti natalged a wagas ti panagrambak a saan a mangpataud iti aniaman a peggad wenno pannakadangran gapu iti makadidigra nga uram,” kinuna ni Calica.
Inyebkas ni Calica ti namnamana a mataginayon ti balligi itay napan a tawen babaen kadagiti nadumaduma nga
inisiatiba, pakairamanan ti fire safety awareness campaigns kadagiti barangay ken ti enhanced community monitoring program a pakairamanan ti panagiwaras kadagiti safety flyers ken panangipaskil kadagiti tarpaulin nga addaan iti fire prevention tips.

Ad-adda pay a binalakadanna ti publiko nga agusarda kadagiti alternatibo a sound-making devices imbes a
pyrotechnics ken paputok bayat ti selebrasion. Kabayatanna, inbinglay ni BFP Ilocos Sur Fire Marshal Ramel B. Borja ti sumagmamano a palagip a mangiwanwan kadagiti umili bayat ti panaglayagda iti panawen ti bakasion bayat ti naisina nga interbiu. “Agtungpal kadagiti pagannurotan, saan nga agusar kadagiti maiparit a paputok wenno gumatang iti illegal, ken gumatang iti paputok kadagiti lisensiado laeng a managlako,” kinuna ni Borja.

Binalakadan pay ni Borja ti publiko nga agsagana ti sangatimba a danum iti asideg dagiti lugar a pagsilawan ti
paputok kas panagannad no adda mauram, ken dagus nga adda danum a pagbugguan ti rupa wenno mata no adda tumaud nga aksidente. Impalagipna pay ti panagannad ti publiko no ibellengda dagiti paputok, siguraduenda a saan a maibelleng dagitoy iti asideg dagiti nalaka a mauram a materiales a kas iti naurnong a papel wenno kurtina.
Pinadayawan ni Emerson Garcia, residente iti Barangay Solid West ditoy, ti BFP iti serbisioda iti publiko babaen
ti tinawen a gannuatda para iti bakasion.

“Suportarak daytoy a programa gapu ta daytoy ket para iti kinatalged ti publiko; tapno malapdan dagiti banag a saan koma a mapasamak ka kadagiti insidente ti uram, ken pagarupek a makaaramidtayo pay laeng iti arimbangaw a
ditay agusar iti paputok,” kinunana. Pagtalinaeden ti BFP-Ilocos Sur ti agtultuloy a panangmonitor iti intero a
bakasion ti Paskua ken Baro a Tawen babaen ti panag-roving kadagiti fire truck-da iti maminsan iti inaldaw bayat ti
panangpabettakda met kadagiti safety tips kadagiti speaker-da tapno suportaran ken maipatungpal daytoy a kampania.

Daytoy a gannuat, segun iti BFP, mapapigsa babaen ti panag-roving iti mamindua iti inaldaw iti Disiembre 24 ken 25, kasta met iti Aldaw ti Baro a Tawen inton Enero 1. Naisagana met amin dagiti fire station kadagiti 34 nga LGUs nga addaan kadagiti ramitda no kas pagarigan ti emerhensia, ken agtultuloy met ti pannakikoordinarda iti Philippine National Police (PNP) ken dagiti lokal a gobierno iti Ilocos Sur tapno masaluadan ti probinsia.

(ATV/VGS, PIA Ilocos Sur/ PMCJr.-ABN)