Pannakasolbar dagiti political killings iti LU nakiddaw iti PNP, Kongreso

January 13, 2019 Provincial

SIUDAD TI SAN FERNANDO, LA UNION – Dawdawaten dagiti Crusaders for Peace ti nadaras a pannakasolbar dagiti political killings iti probinsia kalpasan a dagus a narisut ti pannakapapatay ni Ako Bicol Partylist Representative Rodel Batocabe ken kadwana a security escort.
Kinablaawan ti grupo ti Philippine National Police (PNP) iti nakuna a balligi a panangsolbar iti asasinasion ni Batocabe iti Barangay Burgos, Daraga, probinsia ti Albay idi Disiembre 22,2018.
Kinuna ti grupo a pinangato daytoy ti kredibilidad ti PNP iti panangidaulo ni Director-General Oscar Albayalde mainaig iti panagresolba kadagiti krimen.
Intudo ni Albayalde ni Mayor Carlwyn Baldo ti Daraga, Albay kas utek ti krimen.
Kinuna ti Crusaders for Peace-La Union, babaen ti maysa nga statement, a ti inwayat nga estratehia ti Kongreso a panangipangato iti gunguna tapno dagus a maresolba ti kaso ket epektibo ken nangallukoy kadagiti netizens a mangted iti makatulong nga impormasion.
“We, as social advocacy group, the Crusaders for Peace, urge the leadership of the House of Representatives to apply the same successful strategy in resolving the political killings in La Union,” segun iti statement ti grupo.
Immuna iti daytoy, inyebkas dagiti umili ti La Union ti pannakaalarmada iti nagsasaruno a political killings iti probinsia a nangrugi iti pannakapapatay ni sigud a La Union 2nd District Rep. Eufranio “Franny” Eriguel idi Mayo 12, 2018.
Daytoy ti rugi dagiti “high-profile killings” iti probinsia, sinaruno ni Sudipen Mayor Alexander Buquing a napapatay kadwa ti security escort na idi Oktubre, ken ni Balaoan Vice Mayor Alfred Concepcion idi Nobiembre. Ti anak ni Concepcion a ni Mayor Aleli Concepcion ket nasugatan iti nakuna nga insidente.
Mamati ni Representative Sandra Eriguel a ti pannakapapatay ti asawana ket maigapu iti politika.
Kinunana nga uray adda dagiti dati nga opisial ti La Union police a naikkat, agtultuloy ti wayawaya ti mastermind iti krimen kagiddan ti saan pay la nagsarday a panangbutbuteng ken harassment manipud kadagiti goons ti karibalda iti politika.
Immunan a kiniddaw idi ni dati a Presidential Spokesman Harry Roque ti pannakasolbar dagiti kaso ti murder iti La Union ken ti pannakaideklara ti probinsia kas election hot spot.
Kinuna ti Crusaders for Peace a kasapulan nga ipangruna ti gobierno ti pannakasolbar dagiti nakuna a krimen iti La Union tapno saanen nga agramaram ti kinaranggas iti probinsia.
WJ.GARCIA/ABN