Toneladang gulay ng Benguet, nabubulok sa mga taniman

January 13, 2019 Headlines

LA TRINIDAD, BENGUET – Kung noong nakaraang taon ay sobra ang taas ng presyo ng gulay sa Benguet, ito ay kabaliktaran ngayong unang buwan ng taon dahil sa tone-toneladang gulay ng Benguet ang di umanoy nabubulok na lang sa mga taniman sa lalawigan partikular sa bayan ng Buguias, Atok, Mankayan at sa munisipalidad na ito.
Kamakailan lamang ay ibinulgar ng isang opisyal ng kooperatiba ng mga nagtatanim ng gulay sa probinsia ang nakapanlulumong kalagayan ng industriya ng gulay sa Benguet kung saan tone-toneladang naaning gulay ang hinahayaan na lamang mabulok sa malawak na taniman sa Benguet bunsod ng labis na suplay.
Ayon kay Augusta Balanoy, general manager ng Benguet Farmers Marketing Cooperative, ang mga nagtatanim ng gulay sa probinsya ay umaani ng tinatayang 3.5 milyong kilo kada araw mula nang nagsimula ang taon kung ikukumpara sa normal na pag-aani ng 1.2 milyong kilo kada araw.
Aniya, ito ay sa gitna ng pagbaba ng demand dahil sa pagtatapos ng holiday season.
Sa kabila nito ay ibinibilang ng Department of Agriculture ang pagbaba ng presyo na nasa normal lamang. “We monitored the prices of vegetables in trading post daily. This first week of January, it declined by 30 percent and that’s normal, because of the high prices and the demand during Christmas and New Year. Right after the holidays, it will really go down,” ani Department of Agriculture-Cordillera director Cameron Odsey.
Sa isang official online post, sinabi nina Odsey at agriculture chief Emmanuel Piñol na tumanggi ang mga traders na bumili ng gulay mula sa farmers dahil sa mga baha sa Bicol na humahadlang sa kanila upang maihatid ang mga gulay sa Bicol at Visayas. “Vegetables do not only go to Manila but also to Visayas. When typhoon Usman hit the country last week of December, no Ro-Ro boats were available during the typhoon which is one factor why there are less buyers,” paliwanag ni Odsey.
Pinag-aaralan ng agriculture department sa Cordillera na makipagtulungan sa local government units upang makapagtatag ng surveillance system sa bawat bayan na magtatalaga ng mga itatanim na gulay upang maiwasan ang duplication o pagkakaroon ng parehong uri ng tanim na gulay.
Ipinangako ng DA at ng Philippine Crop Insurance Corporation (PCIC) na sisimulan ang validation process upang makilala ang mga magsasaka na nalugi bunsod ng mga nakaraang bagyo kasunod ng pamamahagi ng insurance payments.
“As per instructions of DA Secretary, first we are going to validate and identify how many farmers, if they are covered by crop insurance. If they are, they can automatically claim, (and) if they are not covered, we will encourage them to access credit for them to utilize,” kinumpirma ni Odsey.
Ngunit giit ni Balanoy, hindi maaaring ang isagot ng gobyerno sa suliranin ng mga magsasaka ay ang pagpapautang ng agriculture department. “It is not an emergency measure that the farmers’ need,” aniya.
Samantala, inilahad din ni Balanoy ang nagpapatuloy na problema ng mga nagtatanim ng gulay bunsod ng pagkakaroon ng mga tinaguriang “middlemen”.
Aniya, nagiging triple na ang presyo ng gulay kapag nakakarating sa mga mamimili dahil sa naturang sistema.
Paliwanag ni Balanoy, ang mga ibinebentang gulay ay dumadaan sa tinatayang anim hanggang walong patong ng middlemen bago makarating sa merkado publiko mula sa mga farms.
Inihalimbawa ni Balanoy ang presyo ng gulay na binili sa farm na P18 kada kilo at nagiging P60/kilo kapag binili na ng mga konsumer sa palengke bunsod ng hindi bababa sa anim at hindi tataas sa walong “layers” na pinagdaraanan sa gitna.
Ang mga presyo ay nagiging triple hanggang makarating na sa mga konsumer o mamimili, aniya.
Sa naturang sistema, ang gulay ay binibili nang bultuhan sa murang halaga mula sa mga taniman at pinapatungan sa bawat dinaraanang middleman hanggang makarating sa palengke kung saan naman ito binibili ng mamimili upang iluto at ihain sa hapag.
Sa sistemang ito ay higit na nakikinabang ang middlemen kaysa sa mga magsasaka kaya sinusubukan itong alisin o bawasan ng gobyerno ngunit, giit ng mga nagtatanim ng gulay sa Benguet, hindi nila nararamdaman ang sinasabing pagsisikap ng gobyerno upang alisin ito.
A.ALEGRE/ABN