Pasahero ng jeep sa Abra, bala sa ulo ang ibinayad sa tsuper

November 18, 2017 Headlines

BANGUED, ABRA – Sa halip na ibigay ang pamasahe ay binaril ng isang pasahero ang ulo ng isang jeepney driver sa bayan ng Tayum, Abra.
Agad namatay ang driver na si Novie Baldemor, 30, mula Cayapa, Lagangilang, matapos na dalawang beses na binaril gamit ang caliber 45 ng hindi pa nakikilalang suspek sa Barangay Bumagkat, Tayum, noong Biyernes, November 10, 2017.
Ayon sa ibang mga pasahero, pumara ang suspek sa Barangay Bumagkat at halip na ibigay ang perang pamasahe, inilabas diumano ng suspek ang baril at nagpaputok ng dalawang beses sa ulo ng driver at agad na tumakas.
Sa gulat ng mga pasahero, kumaripas sila ng takbo sa iba’t ibang direksiyon.
Kasalukuyang iniimbestigahan ng pulisya ang nasabing pamamaril.
Ang insidente ay naganap sa gitna ng kampanya ng Cordillera police laban sa mga loose firearms sa pamamagitan ng checkpoints at raids kung saan naaresto ang walong suspek at nasamsam ang mga armas at bala kamakailan lamang sa Abra at Kalinga.
Dinala ang pitong suspek sa police station ng Kalinga matapos mahuli ng mga otoridad ang isang armas at mga bala sa kanila, hapon ng November 11 sa Sitio Talaka, Barangay Agbannawag, Tabuk City.
Ang mga suspek ay kinilalang sina Nestor Sabawil, 23, magsasaka, driver ng kuliglig; at mga pasaherong sina Aries Dawing Macaiba, 19; Julius Tupay Innog, 21; JR Longdason Gayyad, 22; Jeppy Appag Wassigan, 21; Hogan Goyagoy Paclay, 26; at Rubin Longdason Baccoy, 25, lahat ay mula Brgy. Lacnog, Tabuk City. Nakuha sa kanila ng mga otoridad ang isang homemade caliber .357 revolver at mga bala.
Hinudyatan ng otoridad ang mga suspek at napansin nila ang isang green sling bag na naglalaman ng .357 revolver na may markang S&W .357 magnum na walang serial number at may anim na bala. Walang sinoman sa mga suspek ang umamin kung kanino ang nasabing armas at wala rin diumano silang maipakitang dokumento sa mga otoridad kung bakit nasa kanila ang nasabing armas.
Samantala sa Abra, dinala sa police station ang suspek na si Renato Molina Javier, 65, matapos makita sa bahay nito sa San Jose Norte, Manabo, ang isang Bersa Thunder caliber 380 pistol na may Serial No. 357432, may 12 na bala at dalawang magazines, sa raid na isinagawa noong November 10 ng umaga.
Nangako ang Cordillera police na ipagpapatuloy nila ang paraan ng gun-controlling sa rehiyon upang mapigilan ang mga krimen. Humihiling ng suporta si Cordillera police director Chief Supt. Elmo Sarona at nagsabing “everyone’s effort is needed to obtain a lasting peace in the region.” ACE ALEGRE / ABN