8th Taboan fest, maisayangkat iti Bauang

November 18, 2017 Headlines

BAUANG, LA UNION – Maisayangkat ti maika-walo a Taboan, ti tinawen a festival dagiti mannurat iti pagilian, inton Nobiembre 27 inggana 29, 2017 iti Marand Resort and Spa, Baccuit Sur, ditoy nga ili.
Ti Taboan ket manipud iti sao dagiti Bisaya a kayatna sawen ket “market place” wenno tiendaan. Maawagan met kas National Writers Festival, ti Taboan ket maysa a pasken no sadino ket agdidinnanggay dagiti nagduduma a mannurat iti pagilian ken dagiti audience-da.
Agserbi kas maysa kadagiti kangrunaaan nga agbitla ni National Artist of the Philippines Bienvenido Lumbera. Ni Dr. Butch Dalisay ti agdiskurso iti “Celebrating Arguilla” kabayatan a ni Manix Abrera ti mangipalawag iti “Humors and Resilience in Philippine Literature” iti umuna nga aldaw ti pasken.
Matalantan pay iti agpada nga aldaw ti “Surviving War: The Politics of Witnessing and Recollection”, “Local Color, Global Tones: A Discussion on Harnessing Cultural Identities” ken “Caps and Lower Case: Negotiating Content, and Increasing Professionalism in the Workplace of Writers”.
Manamnama a talantanen ni Lumbera ti “Rediscovering Arguilla”; ni Jun Cruz Reyes ti maipapan ti “Local Color in Modern Philippine Literature”; Mary Jane Ortega, “Japanese Occupation of La Union”; ken National Artist Francisco Sionil Jose, “Reflections on Arguilla.
Maisayangkat pay ti lecture-workshop iti Teaching Literature: Poetry babaen kenni Dr. Isidro Cruz; Fiction babaen kenni Dr. Luna Cleto; Drama, Haidee Palapar; Creative Non Fiction, Dr. Priscilla Macansantos ken Dr. Hope Yu.
Makipaset iti tallo-aldaw a pasken ti Gunglo ti Mannurat nga Ilocano (GUMIL) iti National ken iti La Union, dagiti mannursuro iti literatura iti elementarya ken sekondarya, National Commission for Culture and the Arts (NCCA), ken National Commission for Literary Arts (NCLA).
Segun kenni Dr. Juliet Mallari, festival director, “I chose Bauang to be the venue. I found the town very peaceful, the people friendly and accommodating. Besides Bauang has beautiful tourist spots it can offer.”
Mapasamak ti Mayor’s Night nga idauloan ni Mayor Eulogio Clarence Martin P. de Guzman III inton Nobyembre 27, 7pm iti sango ti Sts. Peter and Paul Church.
Ti Governor’s Night nga idauloan met ni Gov. Francisco Emmanuel “Pacoy” R. Ortega III ket maisayangkat iti Diego Silang Hall. BAUANG PIO / ABN