Paskua kadin nga agpayso Kayong?

November 11, 2017 Opinion Sirmata ken Tagtagainep ni Mang Gusting

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Naimbag nga oras kadakayo amin nga awan malabusan este malabsan kunami koma. No dakami met ditoy batugmi a langit ti kayatyo a maamuan, sus maria kusina, saan a maawatan ti paniempo na. Kalablabas manen ta kaudian a bagyo a simmangbay iti masakupan ti pagilian Kayong. Nupay saan a narikna unay dagiti dadduma a paset ti pagilian ngem iti Cagayan Valley ti nakarikna iti makalawas a todo a no sadino ket nagpasarda manen it layus, adu manen ti makuna a naperhuisio ta manu aldaw a dida makatrabaho wenno makaruar ta layus met iti paraanganda.

Mabiit man pay Kayong ta adda istoryaek kenka tapno agkatawa kay met bassit…

Idi agkita kami ken Pare Kolas, nadlawko a dagus ti baro a sapatosna. Ket—
Gusti: Ne, pare Kolas! Adda manen sabali a sapatosmo, a, imbag pay kenka.
Kolas: Insorpresa ni baketko idi naminsan, Chairman Gusting.
Gusti: Kasano a sorpresa?
Kolas: Nakitak idiay siruk ti katremi, Chairman.
Gusti: Ania?
Kolas: [katawa] ket no adda pay kaduana a T-shirt!
Gust: Ngeek…

Wahaaaaa…kitaem a ta amangan no sapatos ken t-shirt ni kumaprem, hahahaha.

Ania, immisem ka met laeng Kayong Angkuan? Sus maria kusinan, an-annadanyo kaarruba ta amangan masalisi-an dakayo, yayayy. Wen gayam, Kayong, kasla paskuan a talaga a di maliklikan ta pasig metten a dekorasyon ti paskua ti makitak a nakasab-it iti babbalay ken agandap-andap a silaw iti rabii ngem ney, annadanyo ta amangan no dayta ti pakaigapuan ti uram ket imbes a naragsak ti paskua ken baro a tawen ket dumapo met la ngarud ta kalapaw mo. Isu a kanayon a maibalbalakad a kitaen ti kalidad dagiti gatangen a Christmas light, saan a gapu ta nalakan ket sige lattan.

Bayat a masursurat daytoy kolum tayo Kakayong ko ida ket mapadpadaanan ti isasangbay dagiti delegado ti makuna nga ASEAN Summit a maangay ditoy pagiliantayo. Ta koma ket makitada dagiti talaga a parikut ditoy pagilian. Ket umuna, isu ti parikut ti kaawan panggedan dagiti umili nga isu met ti mangidurduron iti tao nga agaramid iti dakes. Daytoy ti maysa a makita tayo a ramut ti kinadakes, mapilitanda nga agaramid ken isu pay ketdi ti makitatayo nga adu dagiti aglabsing maipanggep iti pannakailako ti maiparit a droga ta nagbiit ti agka-kuarta ditoy. No saan a panaglako iti droga, panagtakaw wenno hold-up, ngem no koma adda naan-anay a pagtrabahuan dagiti umili dida mapanunot dayta.

Koma ngarud Kayong dayta ti maysa a kitaen ken ipangpangruna ita dagiti li-lider nga agtitipon ta agi-invest da ditoy pagilian ngem no maminsan adda panagduadua dagitoy gapu ngarud iti parikut ti urnos ken kapia nangruna ket kalkalpas ti makuna a gubat idiay Marawi a no sadino ket dimmanun pay iti aganay lima bulan. Sus Maria Kusina, isu koma ti ipangapangruna a matalantan Kayong ti pannakanayon ti panggedan.

Ne, ne, ne, Kakayong naimasantayo manen a kunak isu a baliwantayto manen, a. Opsss, aglisika man met iti pagnaak sika Atong, addaka manen a kunak, pasalsali ka a kanayon. Ania manen ti masapulmo aya? Makalag a numero? Sal-ot ka met, kubrador ka idi kubrador ka pay laeng agingga ita, ala man laengen sige, kalagem man tay opisyal a komkombiokong, hahahaah, ta balatuannakto no mangabakka. Apowww, dakesen…ni Sofing dayta sumungaden nga adda awitna a binalsig. Babayooo, tsuptsup muahmuahhh.