PDEA, lilinisin sa droga ang 19 barangay sa Baguio bago SONA, kaya ba ito?

June 4, 2017 Balitaktakan sa Amianan Opinion

Nakakabilib kung hindi man nakakagulat ang naging pahayag ng Philippine Drug Enforcement Agency (PDEA)-CAR na pursigido silang putulin at linisin sa droga ang 19 barangay sa lungsod ng Baguio at buong rehiyong Cordillera hanggang Hulyo bago ang State of the Nation Address ni Pangulong Rodrigo Duterte. Magandang balita ito kung ito nga ay matutupad.
Ayon sa ahensiya ay may apat na milyon ang drug users sa Pilipinas at napakalaking demand nga naman ito. Sa ngayon ay hindi pa naiideklarang drug free ang Baguio at Benguet at ayon sa tagapagsalita ng PDEA-CAR ay dalawang hakbang ang kanilang pagtugon upang makamit ang target nilang paglilinis hanggang Hulyo. Una ay ang supply reduction approach na kung saan ay minomonitor at kinikilala ang mga checkpoint bago putulin ang supplies ng mga drug user. Pangalawa ay ang demand reduction approach na kung saan ay puputulin ang demand sa paglalagay sa mga drug user sa treatment at rehabilitation centers.
Tama rin ang kanilang balak na pababain ang supply at demand dahil kung supply lamang ang huhulihin ay magiging walang silbi raw ito dahil malaki pa rin ang demand – ang mga drug user. Bakit may mga nagbebenta ng droga sa Pilipinas? Dahil nga malaki ang demand at kung hindi naampat ay lalaki pa ito.
Kailangang maging totoo at pursigido ang mga ahensiyang may pakialam sa droga dahil kung tuluyan silang malulusutan ng tila mas magaling sa kanila gaya sa pagkakadiskubre ng higit 500 kilong shabu na nagkakahalaga ng P5 bilyon na idinaan sa “express lane” ng Bureau of Customs ay magiging walang katuturan nga ang kampanya ni Pangulong Duterte laban sa droga. Sa kabila ng matigas ang malakas na paninindigan ng pangulo upang gawing mailinsi sa droga ang bansa kung may mga kawani, opisyal at ahensiyang hindi pa malinis-linis ay mapapahiya lamang tayo sa mata ng mundo at walang maiiwang kawawa sa huli kundi ang mga kabataan at susunod na henerasyon.
Kung matutupad ng PDEA-CAR na malinis ang Baguio at Cordillera sa droga sa Hulyo ay walang pagsidlang galak ang mga puso ng mamamayang Pilipino.