PGLU NANGIPAAY ITI SOLAR-POWERED IRRIGATION SYSTEM, MANGPAPIGSA ITI PRODUKSION DAGITI MANNALON
ROSARIO, La Union
Manamnama ti nadur-as nga apit ken produksion dagiti mannalon idiay ili ti Rosario kalpasan ti inagurasyon ti Solar-Powered Irrigation System (SPIS) idiay Barangay Tabtabungao idi maika-13 iti Pebrero 2025. Indauluan ni Gov. Raphaelle Veronica “Rafy” Ortega-David ti inagurasyon kadua dagiti miembro iti Farmers Association for Innovative Technology and Harvest (FAITH), opisyales iti probinsia ken munisipio kasta met dagiti mannalon. Babaen iti panangidaulo iti Provincial Government of La Union (PGLU), ti nadakamat a sistema ket agar-aramat iti solar energy a mangipaay iti natalged a suplay iti danum.
Kabaelan pay daytoy a kissayan ti fossil fuels ken mangsigurado ti natalged nga irigasyon para kadagiti mannalon. Panggep iti SPIS a
mapaadu ti apit, mapababa ti gastos iti irigasyon ken mapasayaat ti pagsapulan dagiti mannalon. “Kastoy ti kayatko para iti probinsiatayo – napaspas a maipapaay ken maar-aramat dagiti proyekto a para kadagiti KaPROBINSIAnihantayo. Babaen iti SPIS, saan tayo laeng a mapadur-as ti suplay iti makan iti probinsiatayo, kabaelan tayonto payen a maikkan ti oportunidad dagiti mannalontayo,” kinuna ni Gov.
Rafy. Pangpanggepen pay ti gobernador ti mangibangon kadagiti nadakamat a proyekto tapno naan-anay a masuportaran ti sektor ti Agrikultura iti probinsia.
Aganay 25 a mannalon ken 20 a pagtaengan ti mabenepisiaran iti proyekto karaman ti lima nga ektarya a taltalon a pagimulaan iti pagay,
mais, natnateng, mani ken makatulong kadagiti agtartaraken iti dinguen. Inpanamnama met iti PGLU ti panangbukel kadagiti baro a
solusyon tapno mailungalong dagiti wagas a mangsaluad iti aglawlaw para iti panagdur-as ti Agrikultura iti probinsia a napateg a wagas tapno magun-od ti probinsia ti sirmata nga agbalin a Puso iti Agri-Turismo iti Amianan a Luzon.
Geraldine B. Salazar-Lucero, PIO; Provincial Engineering Office
PANGASINAN READY FOR SECOND FILM FEST, CALL FOR ENTRIES MADE
March 16, 2025
