PGS Silver Trailblazer Award, nagun-od ti LU

July 2, 2017 Headlines

BAYANIHAN CENTER, CIUDAD TI PASIG – Pinadayawan ti Institute for Solidarity in Asia (ISA) ti Probinsial a Gobierno ti La Union (PGLU) iti Silver Trailblazer Award kalpasan iti nabalaigi a presentasion idi Public Governance Revalida para iti Performance Governance System (PGS) Pathway Compliance Stage a naisayangkat idi Hunio 21, 2017.
Nangrugi ti presentasion ti probinsia iti dua nga Audio-Visual Presentation (AVP).  Naipabuya dagiti gannuat ti PGLU para iti PGS Compliance Stage a pakaibilangan iti Cascading Activities; pannakabukel iti Office for Provincial Strategy (OPS) ken Multi-Sectoral Governance Council (MSGC); Strategic Communications Plan; dagiti makuna a quick wins iti PGLU maipapan iti PGS babaen iti agduduma a testimonia; ken dagiti panagdur-as dagiti Agri-tourism nga atraksion iti probinsia.
Simmaruno ditoy iti bitla ni Gobernador Francisco Emmanuel “Pacoy” R. Ortega III a nakasentro kadagiti nagapuanan iti PGLU para iti Strategic Initiatives a pakaibilangan iti Agri-tourism Circuit Plans; Investments Promotions Program; Branding and Destination Marketing Campaign; Framers and Fisherfolks Cooperatives and Association Capacity-Building Program; Agri-preneurs and MSME Capacity-Building Program; Tourism Workforce Development Program; Tourism Support Service Standards; Comprehensive Land Use Plan and Zoning Ordinances Alignment Project; Business Process Improvement; Provincial Knowledge Management System; Tourism Infrastructure Project; Agriculture Infrastructure Project; ken Link of Plan to Budget.
Iti bitlana, inpaay ni Gob. Pacoy dagiti nagapuanan ti probinsia para iti sirmata a “La Union, the Heart of Agri-Tourism in Northern Luzon by 2025” nga umno para iti PGS Compliance Stage.  Kangrunaan ditoy ti akomodasion iti Department of Public Works and Highways (DPWH) nga agbalor P1.8bilion a by-pass road iti San Juan, Siudad ti San Fernando ken Bauang nga addaan iti nadagsen a trapik.
Malagip nga idi revalida para iti Initiation Stage, maysa kadagiti inyunay-unay dagiti kameng iti panel ket iti pannakasolbar ti trapik a makadadael iti oras dagiti turista ken negosiante.
Inpannakkel pay ni Gob. Pacoy a babaen iti panagkaykaysa, nagsugpon dagiti ahensia iti gobierno iti Region I para iti naduma-duma a proyekto para iti Agri-tourism nga agbalor P837 a milion para iti 2018.  Tapnu magun-od iti probinsia ti kasasayaatan a teknolohia iti panagtalon, simrek iti maysa a katulagan iti PGLU iti Gobierno ti Israel a mabigbigbig kas maysa kadagiti kalalaingan a pagilian maipapan iti agrikultura.
Tapnu agtaginayon iti urnos ken talna, inwaragawag pay iti Gobernador iti panangisayangkat iti PGLU iti 911 Public Safety Answering Point.  Tapnu agkaykaysa dagiti plano dagiti Component Local Government Units (LGUs) ken PGLU, napabaro met iti Provincial Development and Physical Framework Plan.
Inpannakkel pay ni Gob Pacoy a nakagun-oden iti PGLU iti ISO 9001-2015 a mangpapaneknek iti Quality Management System iti probinsial a gobierno.
Pinadayawan met ni ASec Leandro H. Gazmin ti Department of Agriculture (DA) ti gannuat iti PGLU tapnu maiwaras iti sirmata iti probinsia. Inyunay-unayna a napateg a makadanon datoy kadagiti grassroots a pakaibilangan dagiti mannalon a napateg a rekuerdo para iti Agri-tourism.
Kinuna met ni Dr. Mina T. Gabor, Presidente ti International School of Sustainable Tourism, kasapulan iti PGLU iti napigsa a Marketing Plan aglalo ta dumakdakkel iti bilang a turista nga aggapo iti Association of Southeast Asian Nations (ASEAN).
Ti chairman iti panel a ni Guillermo Cruz iti National Competitiveness Council a naudi a nagsarita ket kinablaawanna ni Gob. Pacoy gapu iti napintas a presentasionna ken naalibtak a lideratona a mangtagtaginayon iti panagkaykaysa iti probinsia a magun-od iti sirmatana.
Kalpasan iti diskusion dagiti kameng ti panel, pinadayawan ti ISA iti PGLU iti Silver Trailblazer Award babaen iti pannakagun-od iti PGLU ti grado a 90.107. Maysa a tropeo a lamparaan iti naawat ni Gob. Pacoy a mangsimsimbolo iti PGLU kas mangsilsilaw iti dalan para kadagiti dadduma nga organisasion ti gobierno nga agturong iti dalan para iti naalibtak a serbisio.
Immatendar met iti revalida dagiti kameng iti Sangguniang Panlalawigan nga idadauloanni Bise-Gob. Aureo Augusto Q. Nisce; dagiti mayor ti probinsia; Governor’s Cabinet; kameng ti MSCG; kameng ti OPS; Mutia ti La Union 2018 Carina Cariño; ken daaduma pay a residente iti La Union. ISRAEL O. RUDIO, Provincial Information & Tourism Office-La Union /ABN