Phaseout ng jeepney, inayunan ni Domogan

March 3, 2017 Latest News

LUNGSOD NG BAGUIO – Sumang-ayon si Mayor Mauricio Domogan sa planong phaseout ng jeepney sa kabila ng kamakailang isinagawang kilos-protesta ng mga transport groups sa lungsod upang kontrahin ito.
Sa kanyang Ugnayan ay nagpahayag ang alkalde ng kanyang pagsang-ayon na ipagbawal ang pagpapasada ng mga lumang jeepney na may edad 15 taon pataas.
“It’s high time that we should totally ban the importing of a second hand vehicles, let us not also forget yung ating environment,” ani Domogan.
Aniya, kung hindi maalis ang mga lumang jeepney ay baka mas lalong makaapekto sa kalidad ng hangin sa Baguio at lalo na sa kalusugan ng tao na makakalanghap ng maitim na usok galing sa mga lumang sasakyan.
Nais umano ng alkalde na maging environmental friendly vehicle ang siyudad.
Panawagan niya sa gobyerno na tumulong maglabas ng bagong motor vehicle na kayang bilhin ng mga bawat operator at drayber ng pampublikong sasakyan. Hinihiling pa niya na magbigay din ang gobyerno ng programa para matulungan ang bawat may-ari ng pampublikong sasakyan na palitan at baguhin ang kani-kanilang sasakyan.
Dagdag pa ni Domogan na tinututukan ngayon lokal na pamahalaan ang pagpapatupad sa  ordinansa sa anti-smoke belching at kasama na rito ang jeepney phaseout.
Sa kabila ng pagsisita ng kinauukulang ahensiya at pamahalaan sa mga may-ari ng sasakyan ay marami pa ring hindi sang-ayon sa ipinapatupad na ordinansa.
Kamakailan lamang ay nagtipon ang lahat ng mga operator ng jeepney kasama ang kani-kanilang drayber dito sa lungsod ng Baguio.
Sa harap ng ahensiya ng Department of Transportation and Communication (DOTC) ay ipinakita at ipinaalam nila ang kanilang hinaing sa usaping jeepney phaseout. Ma. Carmina Lipio, UB Intern