PRO1 Class 2017-01 graduates, kinarit ni Gov. Pacoy

ARINGAY, LA UNION – Binigbig ni Gov. Francisco Emmanuel “Pacoy” R. Ortega III ti kinapinget ti Philippine National Police (PNP) a mangpapapigsa iti gubat a mangsupsupiat iti maiparit nga agas iti pagilian kabayatan ti Commencement Exercises ti PNP Public Safety Junior Leadership Course (PSJLC) Class of 2017-01 idi Agosto 11, 2017 sadiay National Police Training Institute RTC1-Multi-Purpose Hall, ditoy nga ili.
Kinunana a ti pannakabalin ti PNP a mangipatungpal iti linteg ket kasapulan iti gagem ti probinsia a kinatalged ken kinasalinged.
Kas guest of honor ken speaker, kinablaawan ti gobernador dagiti nagturpos iti commitment dagitoy a mangpalawa iti pannakaamo ken kinalaingda babaen ti panangleppasda iti nasao a kurso. Ginutugotna dagitoy a papigsaenda dagiti puso ken nakemda ken reggetanda pay ti panangipatungpal ti linteg tapno magun-od ti tarigagay a kappia, panagdur-as ken kinarang-ay iti buo a rehion.
Indauloan ni Pacoy, kadduada Regional Training Director PSUPT Russel C. Maca ken TS2 Marinova C. Gurtiza, ti panangiwaras kadagiti certificates ken awards dagiti nagturpos a PSJLC Class 2017-01 Alpha to Charlie.
Ti PSJLC Class 2017-01 Charlie Top Gun/Arm for the Male Category ket ni PO3 Erwin M. Alcantara nga addaan ti grado a 99% ken Ricahrdlyn D. Antonio nga adda gradona a 93% iti Female Category.
Kinarit ni Pacoy dagiti nagturpos tapno mapapigsa ti seeguridad ken pannakaipatungpal ti linteg gapu ta aminda ket kampeon ti public service ken good governance. HANA JOSUA C. MARTINEZ, PITO-LU / ABN

Amianan Balita Ngayon