Pulitika latta piman

Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna, nagasat nga aldaw kadakayo nga awan malabsan, sukimi.

Dua lawas kalpasan ti limmabas a bagyo Rosita, adda manen dagiti lugar a kasta unay ti namsaakaanna piman nupay kasla apagdarikmat ti ilalabasna. Ngem nupay kasta, adda latta imbatina a madi nga anniniwan gapu iti kasla layap a didigra iti probinsia Mt. Province gapu met laeng iti reggaay a kas iti napasamak iti Benguet a no sadino adu ti natay a nagaburan nga agingga ita ket saandan a nasarakan ti bangkay dagitoy a kakabsat. No amirisen kabarangayan, kailianmi ida, kasla ketdin pinpindaennatayo a didigraaen, palagipan gapu iti pannakarames ti nakaparsuaan. Ta idi bagyo Ompong, maysa ti probinsia ti Benguet ti nakaro a nadalapus ti nasao a dilobio, malaksid iti probinsia ti Cagayan ken Isabela, ta iti limmabas a bagyo Rosita, dinalapus na met ti Mt. Province. Kuna payen dagiti managpaliiw, makapungpungtoten ti nakaparsuaan gapu iti kinaranggas ti tao, banag a no amirisen tayo ket pudno daytoy, ta ditay sinaluadan ti kinangayed ti nakaparsuaan.

No intay malagip, adu ti nangkontra iti pannakaipasardeng iti panagminas dagiti kakailian tayo nangruna iti Benguet ta sigun kadagiti dadduma, saan a daytoy ti nakaigapuan ti nasao a didigra wenno reggaay. No kasta, saan ngarud a rebbengna a maparitanda iti pagbiaganda. Ngem natibker ti pangngeddeng ti gobierno a matiliw ti asinoman nga aglabsing iti daytoy. Ngem, awan kadin aya ti sabali a wagas wenno pamuspusan tapno adda latta pamataudan dagitoy a kakabsat a napapanaw iti mismo a lugarda ken naparitanda iti pagtataudan iti pagbiagna tapno awan parikut? Ta iti sabali a bangir, pudno met piman.

Sus nalpas ti ani, anak ti tukling a balo, kasta pay kakayong ta ne, overtime tayo manen ket…ala, aglisi ka man dita Atong. Ania man ta isensenyasmon, anunsio iti hueteng? Agingga ita,  dayta pay laeng ti ubram, ala, ala, kalagem man ngarud tay opisyal a kalbo hahahaha. Kasta pay ket ne, nakaadu tayo manen. Babayoo, tsup tsup muahmuah.