Satellite office ti COA iti LU, maipatakder

November 4, 2017 Headlines

SIUDAD TI SAN FERNANDO, LA UNION – Mangnamnama ni Gobernador Francisco
Emmanuel “Pacoy” Ortega III a sumayaat pay ti panagserbi ti probinsial a gobierno kadagiti umili kalpasan a nakitinnulag daytoy iti Commission on Audit maipapan iti panangipatakder ti Provincial Satellite Auditing Office (PSAO).
Ni Gobernador Pacoy ti nangibagi iti probinsial a gobierno ti La Union bayat a ni Assistant Commissioner Delfin P. Aguilar ti nangibagi iti COA iti memorandum of agreement (MOA) a napirmaan idi Oktubre 25, 2017 iti Diego Silang Hall, Provincial Capitol, ditoy a siudad.
Ti nasao a MOA ket babaen ti Sangguaniang Panlalawigan Resolution No. 370-2017 maipapan iti pannakaipatakder ti PSAO a pagopisinaan dagiti auditor.
Segun iti MOA, maipatakder ti PSAO iti Barangay Sevilla, San Fernando City, La Union iti 597 square meters a kalawa ti daga.
Inyebkas ti PGLU ti tarigagay daytoy nga ipaabang ti nasao a lote iti 50 tawen, manipud Agosto 1, 2017 inggana Hulio 31, 2067.
“I am confident that hand in hand, we will continue to innovate and elevate our efforts to guide and empower and strengthen relationships in bringing about true citizen centered transformation in government especially in our mandate as an LGU delivering the basic services to our constituents and to perform more efficiently and effectively,” kinuna ni Pacoy.
Sinigurado pay ti gobernador nga agtultuloy a suportaran ti administrasionna dagiti programa ken adbokasiya ti COA. PITO-LU / ABN