Serbisio para OFWs, ipangruna ti gobierno

November 25, 2017 Provincial

SIUDAD TI SAN FERNANDO, LA UNION – Ipangpangruna ti agdama a gobierno a maipaay dagiti umisio a serbisio para kadagiti Overseas Filipino Workers (OFWs) ken ti pamiliada kas pangsubad ti sakripisioda nga agtrabtrabaho iti ballasiw-taaw tapno dumur-as ti panagbiagda.
Saan la a dayta, dakkel pay ti maitultulong dagiti OFWs iti ekonomia ti Pilipinas gapu ti doliar nga ipat-patulodda iti pamiliada. Kalpasan a maisukat dagiti pamilia ti OFWs dagiti naipatulod a doliar, agbalin daytoy a reserba iti kaban ti gobierno.
Iti agdama, ti Overseas Workers Welfare Administration (OWWA) ti kangrunaan nga ahensia ti gobierno a mangimatmaton kadagiti serbisio para kadagiti OFWs ken ti pamiliada.
Sagsaganaan ita ti OWWA ti pannakaisayangkat ti tinawen a “Family Day” para kadagiti OFWs, dati nga OFWs ken ti pamiliada iti intero a Rehion Uno a maisayangkat ita a tawen iti Ilocos Norte.
Kuna ni Nona Ganal, agdama nga administrative staff ti OWWA iti Rehion Uno, a madaman ti pannakaisagsagana ti programa ti Family Day.
Maar-aramid ti tinawen a Family Day kas panangbigbig ti kinapateg ti akem ken kontribusion dagiti OFWs iti rehion.
Adda pay ipapaay ti OWWA a “welfare assistance” para kadagiti dati nga OFWs.
Dagiti dati nga OFWs nga adda rikriknaen ti bagida, makaawatda ti tulong manipud OWWA no adda maipakitada a “valid medical certificate.”
Kadagiti agkiddaw ti tulong a dati nga OFWs, mabalinda ti agipasa kadagiti opisina ti OWWA iti rehion wenno kadagiti OWWA satellite office nga adda iti Capitol, Laoag City, Ilocos Norte.
No nabiktima ti bagyo dagiti pamilia ti OFW, maipaayanda pay ti bassit a tulong manipud OWWA no la ketdi makompletoda dagiti umiso a dokumento a kasapulan. FGL, PIA-1 / ABN