Sino ba naman ang may gustong mamanmanan at pagdudahan?
Ang isinasagawang diumano’y “profiling”, surveillance o inventory ng PNP sa mga miyembro ng Alliance of Concerned Teachers (ACT) ay agad kinondena ng mga miyembro ng ACT at agad namang sinakyan ng Commission on Human Rights (CHR) at sinabing tuwirang paglabag na sa rights of privacy at association. Nagdulot na raw ito ng pangamba ang hakbang ng PNP dahil na rin daw sa “klima ng panliligalig at banta laban sa mga progresibo at nag-iingay na grupo”. Meron daw panganib sa listahan na maaaring gamitin upang suhetuhin ang mga lehitimong concerns o upang patahimikin ang mga kritisismo o kalaban.
Ayon pa sa ACT ang hakbang ng PNP na palabasin ang listahan ng mga miyembro ng ACT ay bahagi raw ng pasistang pamamaraan ni Pangulong Duterte (ala “tokhang”). Pinagdududahan daw na may kaugnayan ang ACT sa CPP-NPA kagaya ng unang pahayag laban sa National Union of Journalists in the Philippines (NUJP), Bayan Muna, Liberal Party, at lahat ng tinukoy bilang mga “fronts” samantalang ang ginagawa lamang naman daw ng mga organisasyon na ito ay labanan ang di-makataong mga utos ni Pangulong Duterte.
Handa naman daw protektahan ng DepEd ang mga miyembro ng ACT at nag-utos sa regional offices nito na huwag maglabas ng anumang impormasyon hinggil sa grupo. Sa batas ay hindi raw nakatakdang magbigay ng personal na impormasyon ang DepEd bilang isang pampublikong institusyon ayon sa Data Privacy Act of 2012.
Ayon naman kay Chief PNP Oscar Albayalde ay wala daw siyang pinirmahang anumang memorandum at hindi iniutos ang paglikom ng impormasyon sa mga miyembro ng ACT at sinabing maaaring may “kawalan ng ingat” sa kaniyang mga nasasakupan. Sinabi niyang kung totoong galing ang memorandum sa PNP Directorate for Intelligence ay dapat manatili sana itong internal lamang at “confidential” subalit naglalabas daw ang ibang PNP directorial staffs ng sarili nilang reports at memorandums na hindi na pumupunta sa Ofice of the Chief PNP. Sa kabila nito ay sa ganang sarili ni Albayalde ang anumang kagayang memorandum ay hindi magagamit upang i-harass ang mga miyembro ng ACT, maliban na lang daw kung may kasalanan sila sa isang krimen. Trabaho daw ng estado ng protektahan ang mamamayan nito at mga interes laban sa mga kalaban ng estado gaya ng Communist Terrorist Groups o CPP/NPA at mga kapanig o front organizations na inilahad at tinukoy ni Jose Ma. Sison gaya ng Bayan, KMU, KMP, LFS, Gabriella, ACT, Kadena at iba pa. Ang intelligence gathering ayon kay Albayalde ay makakatulong sa estado na kontrolin o supilin ang kapalaluan ng mga komunistang terorista upang ibagsak ang gobyerno sa pamamagitan ng marahas na pamamaraan tulad ng pangingikil, pagsunog at pagnanakaw sa yaman ng mga nagnenegosyo na nagbibigay kabuhayan sa mga nagmamahal sa kapayapaan na mamamayan ng bansa. Ngayong tinukoy na raw mismo ni Sison ang ACT na isang front organization ng CPP/NPA, ang pasan ay nasa mga miyembro na raw ng ACT na humiwalay sila sa teroristang organisasyon dahil ginagamit lamang sila sa infiltration, manipulation, at paggamit sa ranggo ng mga guro.
Ang nabunyag na memorandum ay iniuutos ng PNP na magsagawa ng inventory at nagkaroon ng mga pagbisita ng mga pulis sa 18 lugar kabilang na ang Benguet.
Sino ba naman ang may gusto na namamanmanan siya o pinaghihinalaang may kaugnayan sa terorista, kapanalig o ka-alyansiya ng teroristang grupo. Subalit may kani-kaniyang trabaho ang mga ahensiya ng gobyerno na pinapaniwalaan nating para sa ikakabuti ng bansa at mamamayan nito. Pero sana ang mga hakbang ay naaayon pa rin sa makatao at udyok ng pagsunod sa batas na kinikilala pa rin ang umiiral na karapatan ng bawat isa. Subalit sa kabilang banda, kung wala ka namang ginagawang labag sa batas ay bakit ka mangangamba?
Basura, basuraaa!
January 13, 2019
