Basura, basuraaa!

January 13, 2019 Sirmata ken Tagtagainep ni Mang Gusting

Naimbag nga aldaw tayo manen kakailian, kaarruba, gagayyem ken saan a gayyem. Hehehee, unayen Kayong Angkuan ta uray saanen a gagayyem. Marikna yo kadi met ti lammin a marikrikna wenno mapaspasaranmi ita ditoy siudad ti saleng? Apowww, dimmanun pay piman iti super baba a lamiis ti klimana, agrutap payen ti jacket ken ules ngem kumutokot latta ti lammin. Nupay kasta, saanen a kas idi damo tayo ti sumangbay ditoy siudad ti Baguio dekada 70, ta idi ket supersuper lammin pay laeng ta no ditay agriru adu pay laeng idi ti saleng kadagiti bantay a sakupen ti siudad, saan a kas ita a pasdek wenno babbalay metten ti makitam iti bantay.
Ta intay pay malagip, kailian, kakayong, tay nakabotelya a danum a maiparabaw laeng iti lamisaan ket kasla naggapon iti refrigerator. Kasta kalamiis iti dayta a panawen… no idilig ti kalamminna idi ken ita, makunak a dakkel ti nagbaliwanna. Ngem kuna dagiti expert ken managsukisok maipapan iti paniempo wenno klima, dagitoy intay mapaspasaran nga abnormality ti klima ken saanen a maawatan a panagbaliw ti klima ket bunga amin daytoy ti global warming. Sus maria kusina, adda tayo manen iti daytoy a topiko…no maminsan, masuron a mauma tayo iti daytoy a topiko kakayong, apay kunayo ngata ngem—saanko nga ammo no apay a kastoy ti umapay a riknak tunggal daytoy ti topiko tayo.
Woww, nagadu ti simmursurot iti makuna a parada ti kunkunada a Black Nazarene wenno nangisit a Nazareno. Adu ti makuna a panatiko kadagitoy, dagiti kunada a rebulto ti sasanto ken rebulto ni Hesu Kristo ken dadduma pay. Saantayo a kuestionaran dayta agsipud ta adda nagduduma a pammati tayo ken karbengan ti tunggal tao ti mangpili no ania a sekta ti patien ken surotenna. Ti laeng pinilaw tayo kakayong ket no asino pay dagiti makuna a panatiko ken addan nakristianuan a pammati, awan met manaknakemda kuna tayo laengen ta kalpasan ti parada, sus maria kusina, ginabsuon a basura. Makapasuron a makaparurod ti kasta nga aramiden ti tao, kundi kristianoda kuno ngem nakarangranggasda met iti nakaparsuaan, pulos man a dida pinanunot a madi ti ipaayna ti makitam a basura iti kalsada, no mabulok dagitoy a basura, umangot…maddaan iti makuna a pulyosions.
Iti sabali a bangir, adda latta met dagiti maragsakan iti kasdiay a kina-awan manaknakem dagiti nagibasura lattan iti kalsada kalpasan ti pannakaiparada ti kunada a Black Nazarene. Asinoda kunam, Kayong? Amm, dagiti agpidpidut iti basura. Nakakuartada met iti dayta a gundaway, malaksid a nakuartada, nakalutongda pay iti makunkuna a cleanliness.
Saan laeng nga idiay siudad ti Manila wenno Metro Manila kakayong ti pakapaspasamakan ti kasta, uray ditoy siudad, saanko nga ammo no ammo dagiti bisita ken saan a bisita ti agbasa. Adda met dagiti basuraan ngem, apay a no sadino lattan ti pangibatbatianda kadagiti basurada, abakda pay ti uleg a kunada a no sadino a naglupos ibatinan idiay ti nagluposanna. Manu nga aldaw laengen, mangrugi manen ti makuna a flower festival ditoy siudad ti Baguio, adunto manen ti agdadalupon a bisita, dagiti makuna a turista, lokal man ken international tourists. Ket, maysanto manen a parikut dayta basura, basura, ngem, ala sapay la koma ta saan a mapasamak dayta.
Opssss, kakayong, naimasantayo manen ti nagsasarita ket ne, amangan no kita-kitaennak manen ni editor. Ala kastan kakayong, agingga iti sumaruno manen nga intay panagiinnistoria, babayooo tsuptsup muahmuah.