SONA ni Digong, ayos ba?

July 30, 2017 Daplis Walang Mintis Opinion

Sa wakas natapos din ang ikalawang SONA (state of the nation address) ni Pres. Duterte. Marami ang nagsabing: tunay na malaman, makabuluhan, makatotohanan at prangka. Sabi rin ng iba: kulang. Hindi nabanggit ang hinggil sa ENDO issue at iba pang mga mahahalagang isyu na bahagi ng mga ipinangako raw noon ni Digong. Sabi naman ng mga analyst: ang pinaka-sentro ng mga nagampanan ng Duterte administration (droga, terorismo, kriminalidad) ay nailatag naman ng maayos. Ang termino ng pangulo ay di pa tapos. May limang taon pa. Dapat daw nating tanggapin na ang accomplishments niya sa loob ng unang taon niya ay katumbas na halos ng tatlong taong panunungkulan. Daplis naman ng iba: talagang ganyan ang ating lipunan. Kahit pa maganda na ang iyong ginagawa, pangit pa rin sa iba. Sabagay, kung may puna, mas matatag kung maitutuwid. Ang delikado kung sobra naman na ang pagpuna na wala namang naitutulong sa sosyodad, yan ay mapanira na, di ba?

******
Isang ikinagulat ng marami lalo na sa panig ng media ay ang pagkambiyo ng pangulong Digong sa kanyang dapat na rota pagkatapos ng kanyang SONA. Sa halip na dumeretso sa Malakanyang para sa Presscon, umakyat siya sa entablado ng mga rallyista at hinarap niya ang mga ito. Kung lilimiin, napakadelikado ang kanyang ginawa. Maaari siyang isabotahe o kaya’y saktan, o kaya’y patayin, di ba? Pero dahil gusto niyang pakinggan ng harapan ang daing ng mga militante at makakaliwa, humarap siya nang walang pakundangan, nang walang takot at pag-aalala sa kanyang seguridad. Wala pang pangulo ng bansa ang nakagawa nito, siya lang, ayon sa ulat. Kahit na sinisigawan siya at hinahataw sa eksenang yun at binubulyawan, hindi siya nasindak. Bagkus, sinabi niyang hindi siya natatakot sapagkat galing na siya sa estadong ganyan. Sana, naintindihan ng mga nakaharap niyang grupo ang katuturan ng kanyang pagharap. Batid ng lahat na totoo ang kanyang sinabi na may mga representante na sa kanyang administrasyon mula sa makakaliwa, katunayan, tatlo sa kanyang gabinete ang humarap din at nagsalita sa harap ng mga rallyista sapagkat sila ay mga leftist, ayon sa pangulo. Parang ang sinasabi ni Digong: hayaang ang mga hinirang niyang mga makakaliwa na nasa gabinete niya ang magparating sa kanya sa mga hinaing ng grupong ito. Sana, naintindihan ng naturang grupo ang gustong mangyari ni Digong.

*****
Kung magbabalik-tanaw tayo sa mga eksena tuwing matatapos ang SONA ng isang pangulo, mapapadighay ka pards. Merong eksenang halos di na makalakad ang pangulo pagkatapos ng SONA niya dahil sa sandamukal na securities nito kasama ang matataas na opisyal ng gobyerno. Sing-bilis pa ng kidlat na deretso sa naghihintay na bullet proof na sasakyan at lilihis sa kinaroroonan ng mga nagrarally. Meron ding eksena na kulang na lang na bitaytayin ang pangulo (pagkatapos ng SONA) at ilayo at itago sa tao at di mo na maaaring kausapin at deretso Malakanyang. Mga eksenang hindi nangyari kay Pres. Duterte. Halos mangisay na nga sa pag-aalala ang kanyang mga alalay sa kabubulong at takot na takot habang prangkahang pinagsasagot ng pangulo ang hiyaw ng mga rallyista sa kanyang harapan. Sabi nga ng mga damatan: yan ang tunay na pangulo. Taong-tao at hindi plastik. Tama siya nang sabihing: “bigyan ninyo ako ng tamang panahon para maisakatuparan ang mga programa para sa bayan!”. May nagkumento nga: Ang SONA ni Pres. Duterte ay perfect! Sinong nagsabi? Mismong si Kris Aquino, pards. Siya mismo. Adios mi amor, ciao, mabalos!