Sta. Lucia Realty at Tunged clan, nagharap sa konseho

February 25, 2017 Metro BLISTT

Nakakita ng kaunting liwanag sa kanilang suliranin ang mga miyembro ng angkan ng Tunged matapos sumang-ayon ang konseho ng lungsod na pansamantalang ipatigil ang pagde-develop, kasama na ang kasalukuyang fencing project, ng Sta. Lucia Realty and Development Inc. sa pinag-aawayang lupa sa boundary ng Baguio at Tuba sa Asin Road.
Sa kanilang pagharap sa konseho noong Pebrero 20, 2017 ay inihayag ni Monica Dominga, kinatawan ng Ibaloi land claimants na nagmula sa angkan ng Tunged, ang pagbabakod at paglalagay ng golf course ng Sta. Lucia Realty sa lupain na sakop ng pag-aari ng Tunged at sinasaklaw ng kanilang Certificate of Ancestral Land Claim (CALC) ay ilegal at paglabag sa kanilang karapatan bilang indigenous people.
Aniya, lumagpas na ang Sta. Lucia sa pagbungkal ng lupa na kanilang nabili sa Cariño clan na dapat ay 89 na ektarya lamang.
Dagdag pa niya, pati ang pinanggagalingan ng kanilang tubig ay tinabunan upang sila ay tuluyan nang mapaalis sa lugar at nasaktan ang isa nilang kasama matapos nitong sumakay sa isa sa mga bulldozer upang pigilan ang operasyon ng Sta. Lucia.
Hinaing pa ng mga tagapagmana ng Tunged clan, sa ginagawang development ng Sta Lucia ay hindi lang iisang puno ang kanilang itinumba maliban pa sa pagsira ng mga tanim na kabilang sa ikinabubuhay ng kanilang pamilya.
Depensa naman ng kinatawan ng Sta Lucia Realty, hindi totoo ang naturang mga alegasyon dahil ang naputol na puno ay bunsod lamang ng nagdaang mga bagyo. Hindi rin umano totoo na nagkaroon ng pananakit at pananakot sa mga miyembro ng Tunged clan.
Maging ang ginagawang fencing at development ay naaayon sa batas dahil may hawak silang development permit.
Dagdag pa nito, dalawa ang hawak nilang development permits kung saan ang isa ay mula sa bayan ng Tuba at ang isa ay sa lungsod ng Baguio. Ang kanilang permit ay nilagdaan ni dating Vice Mayor Daniel Fariñas at aprubado ni Mayor Mauricio Domogan noong Oktubre 1997 sa pamamagitan ng isang resolusyon.
Maliban dito ay may hawak ding environmental compliance certificate ang Sta. Lucia Realty upang maipatayo ang Pinewood Golf and Country Club Estates.
Ngunit, daing ng descendants ng Tunged, ang kanilang ancestral land claim ay nauna pa kaysa sa ipinapakitang permit ng Sta Lucia Realty.
Sa kasalukuyan ay ipinahinto ng konseho ang operasyon ng golf course at lahat ng development na ginagawa ng Sta Lucia sa naturang lugar.
Kung lalabag ay may karampatang parusa na P50,000 sa bawat araw na kanilang itutuloy ang operasyon.
Muling babalik ang dalawang panig sa susunod na pagdinig ng konseho upang ilahad ang kani-kanilang mga ebidensiya sa alegasyon ng bawat isa. Aubrey Morales, UC Intern / ABN