Suplay ti bagas makaanay, agbalin a ‘Riceponsible’

January 10, 2019 Provincial

Pakaseknan ti tunggal maysa Pilipino ti panaginut ti suplay a bagas tapno masolbar ti panagkurang daytoy a taraon a kangrunaan a maidasdasar iti lamisaan ti tunggal pamilia iti pagilian.
Tapno maipaganetget ti nasaknap a kampania ti panaginut ti bagas, madama nga itantandudo ti Departmento ti Agrikultura (DA) ti “Be RICEponsible
advocacy program.”
Panggep ti “Be RICEponsible” ti pannakaguyugoy dagiti mannalon, dagiti mammanday linteg ken dagiti umili iti intero a pagilian nga aginut iti bagas
iti bukod a wagas.
Nailunsad ti “Be RICEponsible” idi 2013 kabayatan ti selebrasion ti “National Year of Rice” tapno makiddaw ti tunggal Pilipino a makipaset para iti pannakagun-od ti panagbalin ti pagilian a kas “rice self-sufficient” wenno pagilian nga addaan ti makaanay a suplay ti bagas a kanen dagiti agindeg.
Idi 2008, basar iti resulta ti panagsukisok dagiti eksperto, agsaysayang ti tunggal Pilipino ti dua a kutsara nga innapuy wenno siam a gramo ti bagas iti tunggal aldaw. No masumar ti nasayang nga innapuy babaen ti pannangimultiplay iti umaboten a 100 milion a populasion iti Pilipinas iti dayta
a tawen, 12 a porsiento ti kaibatoganna nga imported a bagas ti nasayang nga addaan balor a P7.27 bilion. Kaibatogan ti kanen ti 2.5 milion a Pilipino
iti uneg ti makatawen ti nasayang nga innapuy idi 2008.
Kinuna ni Erlinda Manipon, agdama a Regional Technical Director ti DA Region 1, a saan nga agsaysayang ti innapuy ti tunggal umili babaen iti panangkaan ti innapuy nga ikarga iti pinggan, mangan ti brown rice wenno innapuy a nailaok iti mais, ken pagyaman dagiti mannalon gapu iti reggetda nga agpaadu ti bagas.
Kas mannalon, ituloy ti agmula ti pagay ken usaren dagiti kabaroanan a teknolohia tapno umado ti produksion ti bagas.
Para kadagiti mammanday linteg, masapul a tumulongda a mangaramid ti linteg wenno polisia a mangipaganetget ti husto ken umiso a kaadu ti innapuy a kanen ti tunggal Pilipino.
Iti agdama, adda dagiti gobierno lokal a nagaramid ti ordinansia para iti panagkaan ti kagudua tasa nga innapuy tunggal pannangan iti restoran wenno karinderia tapno maliklikan ti pannakasayang daytoy.
Tapno mapasingkedan ti kampania ti “RICEponsible,” nangipaulog ti gobierno nasional ti maysa a Presidential Proclamation No. 524 Series of 2014 a mangistablisar ti selebrasion ti National Rice Awareness Month (NRAM) tunggal bulan ti Nobiembre nga idaulluan ti DA ken dagiti sangayna ken dagiti naka-attached nga ahensiana.
FREDDIE G. LAZARO, PIA-1/ ABN