TURISMO AT KAPULISAN, MAHALAGANG MUKHA NG LUNGSOD

November 25, 2022 Editorial

Sa muling pagluluwag ng mga restriksiyon at ang layong muling pasiglahin ang industriya ng turismo sa lungsod ng Baguio na hindi maikakailang labis na naapektuhan ng pagtama ng pandemya ng Covid-19 ay inuudyok ng Sangguniang Panglungsod sa pangunguna ni Councilor Lilia Farinas, chairwoman ng committee on tourism, special events, parks and playgrounds na kailangang suportahan ng lahat, opisyal man o mamamayan ang lokal na turismo ng Baguio.

Tama na naapektuhan ang lahat sa kasagsagan ng pandemya, sa pagkawala ng turismo ay marami ang nawalan ng trabaho, ng pangkabuhayan at pinagkukunan ng pantawid buhay. Ngayong unti-unti na tayong bumabalik sa dati at binuksan na ang ating lungsod sa mga bisita at bumalik na ang mga aktibidad sa turismo ay makakabawi na ang marami, makakabalik na sa mga trabaho, mga negosyo at pangkabuhayan. Malaking ang ambag at tulong ng turismo sa lahat ng aktibidad sa kabuhayan lalo na sa mga hotel, restaurant at pampublikong transportasyon, maging ng maliliit na vendors.

Subalit hindi pa man lubos na muling nakakaarangkada ang lungsod ay nabahiran ang lungsod kamakailan ng isang hindi kanais-nais na insidente ng tinatawag na diskriminasyon sa lahi sa isang banyagang bisita. Bagaman hindi ito kagila-gilalas na balita ay makakaapekto rin ito sa pangalan ng lungsod at turismo nito dahil sa lawak na ng impluwensiya ng social media. Isang “itim na banyaga” na kalauna’y napag-alamang isa palang miyembro ng US Navy ang hindi pinapasok sa isang establisimiyento dahil daw sa kaniyang kulay at nasiyonalidad kaya dumulog ang “bisita” sa himpilan ng pulisya partikular sa BCPO Station 3 na nakakasakop sa lugar ng pinangyarihan.

Sa halip na makakuha ng simpatiya at marahil ay pagkiling mula sa mga pulis ang “turista” ay lalo pang napasama ang pangalan ng lungsod dahil sa diumano’y hindi propesyunal at pagka-arogante sa pagtanggap ng kaniyang reklamo laban sa establisimiyento. Sa pakikialam ni Mayor Benjamin Magalong sa kaso ng banyaga ay inutos agad ang imbestisyon nito na agad namang tinugunan ng Acting City Police Director PCol. Francis Bulwayan na agad ding tinanggal ang tatlong sangkot na pulis at iniutos na sumailalim sila sa isang refresher seminar sa first responders and phraseology.

Humingi rin ng paumanhin ang operator ng establisimiyento sa banyagang bisita dahil sa hindi malatarungang pagtrato dito. Gayundin ay tinanggap ng bayagang bisita ang paghingi ng tawad ng operator ng establisimiyento at ikinonsiderang sarado na ang kaso. Sa lahat ng ito ay gagawa din daw ang banyaga ng isang follow-on post sa social media upang ipagbigay-alam sa lahat na naayos na ang kaso sa ginawang pamamagitan ng Mayor.

Napaganda pa sa isang banda ang insidente sa kaso ng banyaga dahil nabunyag na ang business permit pala nito ay para sa isang restaurant lamang at hindi dapat magtinda at magsilbi ng alak. Dahil dito ay inutos sa may-ari ng establisimiyento na itigil na ang pag-operate bilang isang bar at mahigpit na sumunod sa umiiral na business permit nito bilang isang restaurant lamang. Kailangan pa bang sa ibang paraan malaman ang ganitong katiwalian ng ilang mga establisimiyento?

Tama ang sinabi ni Councilor Farinas na ang turismo ang “one-town-one-product (OTOP) ng Lungsod ng Baguio, isang produkto ng lungsod na bumubuhay, nagpapalaganap, at maging kung anong lungsod ito. May mga problema sa lakat ng pagsisikap ngunit kalauna’y naaayos din ito sa pagtutulungan at pakikiisa ng lahat ng may pakialam dito. Ang turismo (na kinabibilangan ng iba’t-ibang establisimiyento) at kapulisan ay mahalagang mukha ng lungsod na hindi dapat pagmulan ng ikakabahid nito. Panatilihing irespeto ang pagkakaiba-iba lalo na at ang lungsos ay isa sa pangunahing destinasyon ng turista, kung saan ang turismo pangmatagalang kaakibat ng lungsod sa maraming taon at sa susunod pang mga panahon.