Unity walk sa daang matinik

January 21, 2019 Editorial

Noong nakaraang Enero 13,2019 ay nagdaos ng malawakan at pambansang Unity Walk, Peace Covenant at Inter-Faith Prayer Rally sa pangunguna ng Commission on Elections (Comelec) na dinaluhan ng libo-libong kandidato na sabay-sabay pumirma sa isang pangakong pananatilihin at sisiguruhin ang isang tapat at makatotohanang halalan 2019. Hudyat din ito ng opisyal na umpisa ng panahon ng eleksiyon. Dinaluhan din ng mga multi-sectoral groups, stakeholders, personnel at mga miyembro ng government agencies, religious groups, academe, mga estudyante, civic at ibang non-government organizations ang nasabing aktibidad sa buong bansa.
Sa kabila ng puspusang panawagan ng Comelec sa aktibidad na ito ay napansing hindi lubos ang pakikiisa ng mga kandidato at sa katunayan ay may mga lugar na wala pa sa kalahati sa kabuuang bilang ng mga kandidato ang lumahok sa aktibidad. Marahil ay may kani-kaniyang dahilan ang mga ito sa hindi pagdalo at pagsali. Subalit maliwanag lamang ang ibig sabihin nito – hindi sila interesado sa mapayapang halalan.
Sa Unity Walk, pagpirma sa Peace Covenant at pagdinig sa Inter-Faith Prayer Rally ay nangako ang mga kandidato na respetuhin ang pamantayan ng pag-uugali na inaasahan sa isang public servant at mangakong magsagawa ng isang malinis na kampanya habang pinapanatili ang pantay-pantay, kagandahang-asal, pagiging tapat at magandang loob. Gayundin ipakita ang kahinugan ng pag-iisip ng mga kandidato sa pagsunod sa mga patakaran at regulasyon ng halalan.
Hindi rin maiwasang pagdudahan ang kahihinatnan ng napipintong halalan dahil sa nakaraan, sa naunang eleksiyon ng barangay at Sangguniang Kabataan ay may mga naganap na insidente ng katiwalian, karahasan, mga paglabag at pagpatay. At ngayong nalalapit na mid-term election ay may mga kaso na ng pagpatay, mga insidente ng pagtambang, mga paninira, paninindak na kahit di-tuwirang ituring ng mga awtoridad na walang kinalaman sa politika ay umaalingasaw naman ang katotohanan.
Hindi natin tinatawaran ang magandang hakbang na ito subalit sa likod ng maraming usapin at kontrobersiyang kinasasangkutan ng Comelec ay tila mapapaisip tayo kung may patutunguhan ba ito. Kung masusunod ba ito at kung susundin ba ito ng mga kandidato. Sa mga kaso at isyung ipinupukol laban sa komisyon na ilang malalaking usapin ay hindi pa nareresolba o kahit man lang napagtuunan ng pansin ay baka hindi na maniwala ang taong-bayan sa anumang layunin ng Unity Walk, Peace Covenant at Inter-Faith Prayer Rally.
Paano pa magtitiwala ang taong-bayan sa isang sangay ng gobyerno na inaasahang kapanalig nito ang katotohanan at handang protektahan ang isang sagradong karapatan gaya ng pagboto kung ito ay nadungisan na? Ngayon marahil, higit kailanman ay panahon na para patunayan ng komisyon na ito na may kredibildad pa rin ito, na mapagkakatiwalaan pa ito – pagkatapos ng matagumpay na kampanya ng ligtas, malinis at tapat na halalan sa tulong ng mga ibang ahensiya ng gobyerno at seryosong pagsunod ng mga kandidato at mga kapanalig nila, dahil kung hindi ay matinik pa rin ang daan na tatahakin.
PMCJr.