Iringan ng mga Obispo at Digong, may ending pa kaya?
Mala-telenobela o t eleserye na raw ang litanya ng mga upakan, pasaringan na mistulang parang bastosan na ang umarangkadang mga patutsadahan sa pagitan ng simbahan at ni Pres. Duterte. Laging may anghang ang mga salitang binibitawan ng pangulo kontra simbahang Katoliko at sumasangga lang naman ang kaparihan. Siguro kung paiiralin ang pagiging tao rin ang mga tinamaang mga Obispo baka may kasama ring pagmumura ang mga reaksiyon nila kontra sa banat ni Digong. Ngunit sa halip na sing-anghang ng siling labuyo ang upak ng simbahan, dalangin na lamang ang tugon na sana’y magbago pa ang ihip ng hangin. Tsk tsk, buhay nga naman. Pati raw buhay ng mga mamamayan ay apektado sa naturang hidwaan. Tanong: may katapusan pa kaya o ending ang kanilang iringan?
*********
Maraming kritiko ang nagsasabing parang binat na binat na raw ang istorya ng isang serye sa telebisyon. Bagamat marami rin ang kumakagat sa kasikatan ng teleseryeng ito, hindi maiaalis ang mga negatibong komento. Ito ngayon ang siste: kung sa teleserye na hindi naman nakabase sa tunay na pangyayari ay binabatikos dahil sa batak na batak daw na istorya (marami raw pasingit na mga kontrobersiya upang humaba pa), ano pa kaya kung mga taong buhay na ang kasama sa isang teleserye gaya ng hidwaan o iringan nina Pangulong Digong at ng Simbahang Katoliko? Hindi na bago ang iringang yan. Noon pang kampanyahan bago eleksiyon sangkatirbang batikusan na, di ba? Tuloy, marami ang nagtataka kung bakit ganon na lamang ang inis o galit ni Pres. Duterte sa kaparihan. Ano-ano ba talaga ang mga dahilan bakit para daw kulog at kidlat ang mga upak ni Digong sa mga alagad ng simbahan?
**********
Kung ating susumahin ang mga binibitawang salita, parang may nakaraang eksena sa buhay ni Digong kung saan taga-simbahang Katoliko ang naging kontrabida. Na para bang nayurakan ang kanyang dangal at dahil dito, nawalan na siya ng tiwala at galang. Talagang mabigat ang kinikimkim na dahilan kung bakit pati na ang diyos (ng sekta) ay nadadawit na. Nakakapangilabot ngunit nangyari na ang batikusan hinggil sa diyos. Gaya naman sa inaasahan, inunawa pa rin ito ng kaparihan at dalangin nilang sana’y magbago pa ang hilatsa ng pananalita ng ating pangulo. At kamakailan lang dahil siguro sa sagad na ang pananalag, hindi na nakapagpigil si Novaliches Bishop Emeritus Teodoro Bacani Jr. nang kanyang hamunin si Pangulong Duterte na maglakad nang mag-isa at walang security sa lansangan. Mabigat ang hamong ito kaya pumalag naman ang palasyo sa pamamagitan ni Presidential Spokesperson Salvador Panelo na bagamat nais at kayang tanggapin ng Pangulo ang nasabing hamon ay kailangan na sumunod ang Pangulo sa security protocol upang matiyak ang kaligtasan nito lalo’t siya ang humaharap sa mga problema ng bansa. Dagdag pa ni Panelo na kayang tanggapin ni Pres. Duterte ang hamon ni Bacani dahil noong siya’y alkalde pa ng Davao City, mag-isa niya kapag tinutugis ang mga kriminal. In short, hindi matatawaran ang ipinakitang katapangan ni Pres. Duterte noong siya pa ang mayor ng Davao City.
**********
Dahil sa mga upak at sangga ng magkabilang-panig, may huling tsismis: totoo daw ba na gusto na ni Digong na makipag-usap sa mga taga-CBCP? Magandang balita ito kung totoo, mga pards. Kapag nangyari ito, huhupa na ang matinding iringan at hidwaan at banatan. Isa na tayo sa mga dumadalangin na sana ay magkaisa na ang simbahan at ang estado sa pamamagitan ng planong ito. Sana, sa madaling panahon na isagawa ang pag-uusap upang hindi na lalala ang tensiyon. Sabi nga: matamis magpatawad lalo na kung ito ay kaaway. Adios mi amor, ciao, mabalos!
Consider this
January 21, 2019