WWII veterans, may karagdagang benepisyo

April 15, 2017 Metro BLISTT

May karagdagang benepisyo ang mga beterano ng WWII at kanilang dependents; post World War II veterans, mga sundalong killed-in-action (KIA) at dependents nila sa pamamagitan ng Philippine Veterans Affairs Office-Veterans Memorial Medical Center (PVAO-VMMC) Veterans Hospitalization and Medical Care Program (VHMCP).
Ito ang tinalakay sa isang symposium sa Baguio Convention Center noong Abril 7, at sa inorganisang medical mission ng PVAO-VMMC-Philippine Veterans Bank sa main hall.
Ipinaliwanag ni Dr. Dominador Chiong Jr., VMMC director, na ang medical benefits sa mga beterano ay maaari nang matanggap sa PVAO-VMMC accredited hospitals, eye center, dialysis center at dental clinics. Makikita ang kumpletong listahan sa PVAO at VMMC websites.
Isang subsidy na nagkakahalaga ng P1,500 bawat araw ng pagkaka-ospital hanggang 45 araw bawat pasyente kada taon ay maaaring makuha base sa bill, na may iba pang diskuwento gaya ng Philhealth, Senior Citizen at health insurances.
Ang partial subsidy na maaaring ma-reimbursed mula sa VMMC ay may sumusunod na proseso: cataract surgery, na hindi lalagpas ng P14,000 bawat mata; orthopedic implants, hindi lalagpas ng P30,000; dentures na hindi lalagpas ng P2,500 sa upper, at P2,500 sa lower portion; hernia mesh, na hindi lalagpas sa P2,000; hearing aid, hindi lalagpas sa P30,000 per device, at orthopedic braces, hindi lalgpas sa P6,000 per piece.
Ang hemodialysis at peritoneal dialysis ay sakop din with limits, cardiac bypass reimbursement limit na P200,000; coronary angiogram na hindi lalagpas sa P30,000; chemotherapeutic agents, P10,000 per cycle hanggang maximum na 6 cycles; at angioplasty, P100,000 para sa single stent at maximum lamang na P150,000 para sa dalawa o higit pang vessel stent.
Ang iba pang proseso ay endoaneurysmectomy for thoracic/abdominal aortic aneurysm, pacemaker placement, cranial CT scan, colonoscopy, extra corporal shockwas litotripy (ESWL), rehabilitation services, ventilator rental at kidney transplant ay maaaring i-reimburse.
Ang reimbursement sa drugs at medicines sa confined veteran/veteran dependent ay maibibigay; para sa critical case, na hindi lalagpas sa P10,000 per confinement; at non-critical case na hindi lalagpas sa P5,000 per confinement.
Ang out-patient maintenance medicines ng hypertension, diabetes, hypercholesterolemia, prostate, anti-psychotic at oral antibiotics ay maaaring ma-reimbursed; base sa VMMC bid price, at ang nasabing mga medisina ay dapat maisama sa listahan ng Philippine National Drug Formulary (PNDF).
Ang anti-rejection drugs na nagkakahalaga ng P20,000 per month ay maaari ding maisaayos. Lahat ng request sa reimbursement ng OPD maintenance medicines at oral antibiotics ay kailangang dumaan muna sa VMMC medical screening committee para sa evaluation at validation bago ang processing ng bayad.
Kailangang isumite ng veterans at dependents ang pensioner’s ID at iba pang mga dokumento bilang patunay ng eligibility sakaling maospital; habang ang reimbursement forms ay maaaring ma-download sa website ng PVAO. ABN