100,000MT ng cacao inaasahang malilikha ng Pilipinas sa 2022

February 5, 2018 Provincial

LA TRINIDAD, BENGUET – Kinakailangang makapag-produce ang Philippine Cacao Industry ng 100,000 metric tons (MT) ng fermented beans sa taong 2022 para sa pang-export at domestic markets.
Sa nakalap na dokumento mula kay Edwin Banquerigo, Department of Trade and Industry (DTI) Region 11 assistant regional director at national cacao industry coordinator, target ng industriya ang 40-percent na pagtaas ng kasalukuyang production level ng cacao.
Si Banquerigo ay isa sa mga facilitator sa naganap na Cordillera Cacao Investment forum sa Benguet Provincial Capitol noong Enero 24-26.
Nakasaad sa dokumento ang development directions ng sektor, na kinabibilangan ng expansion ng production areas sa buong bansa hanggang 100,000 hectares, pagtaas ng productivity level ng two kilograms per tree per year, pagtuon sa fine flavour cacao beans, pagpapalakas ng market presence sa pamamagitan ng pagpapabuti ng branding, at pagdaragdag ng halaga.
Binanggit pa ni Bangquerigo ang ilang mga estratehiya upang makamit ang development direction: industry strengthening; expansion, and aggressive promotion; improving farm productivity; increase in production; access to quality planting materials; stronger market linkage and promotion; at continuous research and development.
Inihayag din ni Bangquerigo ang kahalagahan ng cacao para sa malawakang pag-unlad. Aniya, ang industriya ay inaasahang magbigay ng mas maraming trabaho at livelihood opportunities at makapag-promote ng pag-unlad sa kanayunan.
Ang mahalaga, aniya, ang cacao ay napapatakbo ng matatag na domestic at export market demand.
Base sa talang ibinigay ng Philippine Statistics Authority (PSA) sa forum, ang Davao Region ay nagbigay ng 80 percent ng cacao fermented beans noong 2014, habang ang natitirang 20 percent ay mula sa iba’t ibang rehiyon ng bansa.
Iniulat sa nasabing forum na ang production ay nakatuon sa Mindanao. P. AGATEP, PNA / ABN