150 ilegal na istruktura sa Dairy Farm, nakatayo pa rin

September 3, 2017 Metro BLISTT

Nagulat si Mayor Mauricio Domogan nang matanggap ang isang ulat mula sa kinauukulang lokal na opisina ng gobyerno at law enforcement agencies na mayroon pa ring 150 ilegal na istruktura sa loob ng Baguio Dairy Farm na hindi pa nadedemolish ng pinasanib na mga miyembro ng city demolition team at concerned government agencies.
Sinabi ni Domogan na nasa Department of Agriculture-Cordillera (DA-CAR) at sheriff na sagutin ang mga tanong kung bakit may natitira pang istruktura samantalang nakasaad sa special writ of demolition na inisyu ng local na korte ay para sa demolition ng mahigit 334 ilegal na istruktura na itinayo sa pag-aari ng gobyerno.
Inamin niya na may balidong isyu na umiiral mula sa outright demolition ng maliliit na illegal na istruktura habang ang malalaki ay iniwan diumano para sa susunod na paggiba subalit may mga isyung lumabas na dahilan ng temporary suspension nang isinasagawang demolisyon sa lugar.
“It will up to be the concerned government agencies to explain the delay in the demolition of the illegal structures within the Baguio Dairy Farm property. We should remember that the demolition of the illegal structures was an offshoot of a final and executive decision handed down by a local court and not the local government that is why it is the DA-CAR and that sheriff that will answer all the issues and concerns that have cropped up in the course of the demolition,” pagdiriin ni Domogan.
Iprinoklamang pag-aari ng gobyerno ang 92 ektaryang Baguio Dairy Farm sa ilalim ng Department of Agriculture na siyang dapat gamitin sa produksiyon ng dairy products subalit may malaking bahagi ng lugar ang sinakop ng tumataas na bilang ng informal settlers na nagtayo ng mga illegal na istruktura sa iba’t ibang bahagi ng reservation area.
Ayon pa kay mayor ay maliban sa personnel mula sa City Public Order and Safety Division (POSD), ay nagdeploy ang lokal na gobyerno ng may 100 ‘warm bodies’ mula sa Baguio City Police Office (BCPO) na magsisilbing peacekeeping officers sa implementasyon ng inisyal na demolisyon ng 180 ilegal na istruktura.
Hinikayat niya ang DA-CAR at sheriff na bilisan ang resolusyon ng mga isyu na umusbong sa kasagsagan ng inisyal na demolisyon upang ang paggiba sa natitirang mga istruktura ay magpapatuloy para matapos na ang matagal nang isyu sa squatting sa loob ng pag-aari ng gobyerno.
Inamin ni Domogan na isa sa dahilan ng pagka-antala ng demolisyon ng illegal na istruktura sa loob ng Benguet-Ifugao-Bontoc-Apayao-Kalinga (BIBAK) property sa Harrison Road na naka-iskedyul noong Agosto 15, 2017 ay ang katotohanang hindi na kayang magbigay ng kailangang seguridad ang BCPO dahil halos anim na bahagi ng kanilang puwersa ay nadeploy na sa Baguio Dairy Farm kaya naire-set ang demolisyon sa BIBAK sa Oktubre 15, 2017. ABN