Proyektong parking sa Ganza, pagbigyan – Domogan

September 3, 2017 Metro BLISTT

Umapela si Mayor Mauricio Domogan sa mga residente na bigyan ng pagkakataon ang proyektong multi-level podium car parking sa bakanteng lote malapit sa Ganza Restaurant sa dako ng Burnham Park at isaalang-alang ang benepisyong maibibigay ng proyekto sa lungsod.
“We all know that the area has long been used for parking and the project is only intended to maximize its use for the purpose of alleviating the parking problem and generating income for the operation of the park,” saad ng mayor.
Halos 10,000 lagda ang naiulat na nalikom ng “Baguio We Want Forum” upang salungatin ang parking plan at para mapanatili ang kasalukuyang kalagayan ng parke at protektahan ito sa komersalisasyon.
Paliwanag ni Domogan, ang pagpapaayos ng ilang bahagi ng Burnham Park para sa pagkakaroon ng kita ay pinapayagan sa ilalim ng Executive Order No. 224 series of 1995 na inamyendahan upang pahintulutan na maging self-sustaining ang parke.
Sa bisa ng naturang utos, inisa-isa ng lungsod ang mga bahagi ng parke na isasailalim sa development at kinabibilangan ito ng Ganza parking lot at ang lugar ng dating city auditorium.
Nilinaw din ng mayor na ang naturang Ganza parking project ay hiwalay sa proposal na paglalagay ng multi-level parking sa Melvin Jones.
Ang Melvin Jones proposal na noon pang 2002 ay hindi pa naaaprubahan at kailangan pang dumaan sa maraming pagsusuri at konsultasyon.
Ngunit ang bakanteng lugar sa Ganza ay partikular na naitakda para sa paradahan maliban pa sa matagal na itong ginagamit na parking lot kaya isa ito sa nakikitang pagtatayuan ng multi-level parking para magkaroon ng karagdagang paradahan at kasabay nito ay makakalikha ng pondo para sa pangangalaga sa parke.
Noong Mayo ay tatlong konsehal ang nagpasa ng resolusyon na humihiling sa pagpapatayo ng podium car parking sa ilang mga lugar sa lungsod na kinabibilangan ng Ganza, espasyo sa pagitan ng Orchidarium at Children’s Park, sa dating kinalalagyan ng Pantranco, at sa kahabaan ng city library.
Ito ang naisip na solusyon nina Councilors Benny Bomogao, Michael Lawana at Faustino Olowan sa maigting na pangangailangan ng lungsod sa parking areas lalo na sa patuloy na paglago ng turismo at iba pang industriya rito.
Ang naturang proposal ay isinangguni ng city council sa city engineering office, city building and architecture office, at city planning and development office upang bumuo ang naturang mga tanggapan ng agarang plano para matukoy ang mga kalsada sa central business district na maaaring magamit bilang paradahan.
Ang tatlong tanggapan din ang naatasan na magbalangkas ng pangmatagalang plano na kinabibilangan ng pagsasagawa ng feasibility studies para sa pagtatayo ng parking areas sa dako ng lumang city library, Pantranco area, Ganza parking, Camp Allen, slaughterhouse terminal at iba pang naaangkop na lugar at pagtukoy sa lugar ng north-bound at south-bound terminals sa labas ng CBD.
Ang naturang proposal ay isinailalim sa public hearing kamakailan at karamihan sa mga dumalo ay sumang-ayon sa pagpapatayo ng parking facilities ngunit kinuwestyon ng mga ito ang pagkakapili ng mga lugar lalo na sa dako sa city library at sa children’s park.
Nauna rito, isang investor ang nag-propose ng pagtatayo ng multi-use commercial complex sa city auditorium site bilang bahagi ng upgrading ng Athletic Bowl, tennis court at swimming pool sa ilalim ng Public-Private Partnership scheme.
Sa ilalim ng PPP, ang commercial building ay patatakbuhin ng investor habang ang Athletic Bowl at mga pasilidad nito ay mananatiling pag-aari ng pamahalaang lungsod at pangangasiwaan pa rin ng lungsod, ang kita nito ay mapupunta rin sa lungsod.
Ang terms of reference ng naturang proyekto ay inaprubahan ng city council at isinangguni na sa technical working group para magawan ng feasibility study. Aileen P. Refuerzo, PIO / ABN