160 slots sa night market extension, bukas para sa vendors

Metro BLISTT

Upang mapagbigyan ang mga vendor na nagnanais magbenta ng kanilang mga paninda ay palalawigin ng Baguio City Market Authority ang operasyon ng night market sa kahabaan ng Perfecto Street.

Ayon kay city treasurer Alex Cabarrubias ay halos 160 slots ang magiging bakante at bukas para sa mga interesadong tao.

Inutusan ni Mayor Mauricio Domogan ang city engineer’s office na trabahuin ang lighting at markings sa Perfecto Street upang masiguro ang kaligtasan ng mga vendor at customers bago simulan ang operasyon sa katapusan ng buwang ito o unang linggo ng Oktubre.

Samantala ay may 80 regular walk-in vendors ang umaasang mabibigyan ng slots.

Habang nakikinita ng ilang night market associations na magiging kabawasan sa kanilang kita ang pagbubukas ng extension market, ay nais ng mga opisyal ng lungsod na intindihin ang gusto nilang resolbahin ay ang paglaganap ng ambulant vendors na kailangang ma-relocate sa night market area upang maging lehitimo ang operasyon ng kanilang negosyo gayundin sa kapakanan ng kanilang mga pamilya.

Nasa 1,100 vendors ang kasalukuyang nagtitinda sa Harrison Road night market kung saan mga damit, sapatos, accessories, pagkain at marami pang iba ang itinitinda.

Sa loob ng ilang taon ay isang lane ng Harrison Road ang ginagamit mula 9pm hanggang 4am para sa mga night market vendors. Kumokolekta ang lungsod ng P50 bawat gabi bawat vendor. Nakakakolekta rin ang lungsod ng P1.5 milyon hanggang P2 milyon bawat buwan mula sa operasyon sa peak season subalit bumababa sa P1 milyon tuwing tag-ulan.

Magpupulong muli ang BCMA sa Setyembre 18 upang gawing pinal ang rules and regulations sa operasyon ng nasabing extension night market. ABN