2 lalaki mula sa Pangasinan, nadakip sa rent-carnap

August 13, 2017 Police Patrol

ALAMINOS CITY – Muling lumutang ang isang sindikato ng rent-carnap nang mawala ang Toyota Innova na pag-aari ng isang negosyante mula sa Bulacan at nakita sa dalawang lalaki mula sa Bolinao, Pangasinan, Lunes ng gabi (Aug.7).
Ayon sa pulisya, ang mga suspek ay inaresto bandang 8:45pm na nakasakay sa inireklamong sasakyan ng may-ari na si Evangeline Umetso, 45 anyos, mula San Ildefonso, Bulacan, kung saan natunton ang kaniyang sasakyan gamit ang naka-install na active global positioning system (GPS) na gadget.
Nang oras na iyon, ang sasakyan ay hawak ng isang Johnny Inocelda, isang negosyante, 43 anyos; at ang driver nitong si Renante Pascua, parehong taga-Barangay Balingasay, Bolinao.
Ipinaalam ni Umetso sa Alaminos City Police na ang kaniyang sasakyan ay inupahan nang isang buwan ng isang Roger Garvida Fuentes, 37 anyos, mula sa North Fairview, Quezon.
Subalit, natapos ang isang buwan, hindi na makontak ang cellular phone ni Garvia at hindi rin makita sa address na ibinigay.
Nagpatulong na si Umetso sa highway patrol group (HPG) upang makita ang kaniyang nawawalang sasakyan.
Sa pagtatanong sa Alaminos City police kay Inocelda, inamin nito na binili niya ang sasakyan sa isang nagngangalang Gabriel Islocum alias Raymundo ng Fairview, Quezon City subalit hindi siya makapagpakita ng anumang dokumento.
Ang reklamong carnapping ang inihahandang isampa sa mga suspek.
Samantala, ayon sa pulisya, pinaghahanap naman ng mga operatiba ng HPG sina Garvida at Islocom. LEONARDO MICUA, PNA