55 barangay officials na nasuspinde, makakaupo na sa kanilang puwesto

January 21, 2019 Headlines

LUNGSOD NG BAGUIO – Makalipas ang mahigit na anim buwan na pagkakasuspinde ng 55 barangay opisyal na nanalo noong 2018 Barangay at Sangguiang Kabataan elections dahil sa hindi pagsusumite ng Statements of Contributions and Expenses (SOCE), ay binigyan ang mga ito ng pagkakataon ng Comelec En Banc na makapag-serbisyo sa barangay.
Sa bisa ng Comelec en-banc resolution number 18-1127-6, iniutos sa mga local election offices sa bansa na tanggapin na ang isusumiteng SOCE ng mga nasuspindeng barangay at SK officials at inatasan ang local Department of Interior and Local Government (DILG) na sabihan ang mga ito na isumite sa kanilang tanggapan ang Certificate of Compliance hanggang Pebrero 8, para mabigyan sila ng confirmation na makabalik na sa kani-kanilang barangay.
“Tumagal ang desisyon ng en banc dahil sa mga discussion kung gaano kahalaga ang SOCE at lessons na ito sa kanila at yong anim na buwan ay penalty na siguro sa kanila, kaya dapat huwag balewalain ang SOCE at dahil may provisions sa batas ay binigyan sila ng pagkakataon na makabalik sa puwesto,” pahayag ni Baguio Election Officer Atty. John Paul Martin.
“Ang mga nanalo lang ang tatanggapin namin na maghahain ng SOCE, para makaupo sila, yan ang utos ng en banc at yong mga natalo ay hindi namin tatanggapin,” pahayag ni Martin.
Mula sa 128 barangay ng lungsod ay 2,129 ang nag-file ng candidacy para sa barangay, samantalang 416 naman sa Sangguniang Kabataan, sa kabuuang 2,545 candidates.
Sa nasabing bilang, ay 1,785 lamang ang nag-file ng SOCE o 83.84 percent sa kabuuang bilang at 302 naman sa SK o 72.6 percent, sa kabuuang bilang na 2,087 winning and losing candidates.
Lumitaw na 344 ang hindi nag-file ng SOCE sa mga kumandidatong barangay officials at 114 naman sa SK positions.
Ang mga hindi nag-file ng SOCE na nanalo sa eleksyon ay kinabibilangan ng 1 punong barangay; 11 barangay kagawad; 3 SK chairmen at 40 SK kagawad.
Matatandaan noong Hulyo 2018 ay mismong si Mayor Mauricio Domogan ang nagpalabas ng memorandum sa 55 barangay at SK officials na hindi muna sila puwedeng pumuwesto sa barangay hangga’t walang ipinapalabas na desisyon ang en banc, sa layuning hindi maantala ang operasyon ng apektadong barangay.
Ayon kay Martin, unang nag-file ng SOCE ay si Barangay Chairman Emmanuel Cabe at dalawa nitong kagawad na sina Remedios Cabe at Alfredo Almoite Jr., noong Huwebes ng umaga (Enero 17), na agad din niyang inisyuhan ng certificate of compliance.
ZALDY COMANDA/ABN