Agri-Tourism ti LU, suportado ti Liga ng mga Barangay

June 11, 2017 Headlines

SIUDAD TI BAGUIO – Inkari dagiti kameng ti Liga ng mga Barangay-La Union Chapter iti sibubukel a suportada para iti sirmata ti Probinsial a Gobierno ti La Union (PGLU) a “La Union, the heart of Agri-tourism in La Union by 2025” idi umuna nga aldaw iti maika-10 a Liga ng mga Barangay Congress a naisayangkat idi Hunio 4-7, 2017.
Inpalawag ni Gobernador Francisco Emmanuel “Pacoy” R. Ortega III a babaen ti konsultasionna kadagiti mayor ken agduduma a lider iti probinsia agraman kadagiti opisial ti PGLU, napagnunumoanda nga agrikultura ken turismo ti kadakkelan iti potensialda maipapan iti panagdur-as ti La Union. Inpakaammona pay a datoy ti gapu nga iti agri-tourism ti sentro ti Transformative Governance iti administrasiona. Ket manamnama pay a saan laeng datoy a mangparag-o ti turismo ken agrikultura nu di ketdi mangparang-ay pay iti biag dagiti taga-La Union aglalo kadagiti mannalon ken mangngalap.
Inyunay-unay na a kas frontliners ti serbisio publiko, dakkel iti maitulong dagiti opisial iti barangay tapnu magun-od ti probinsia dagiti agduduma a proyeko, programa ken aktibidad iti gobierno. Inpalawagna nga anyaman a gannuat iti gobierno ket saan nga agbaligi nu awanan iti suporta iti barangay.
Sinuportaran datoy iti presentasion manipud iti Provincial Information and Tourism Office. Naipakita nga 227,183 nga ektarya wenno 61% iti daga iti La Union ket maus-usar pay laeng iti panagtalon. Iti probinsia ket addaan pay iti nangato a food-sufficiency kadagiti kangrunaan a taraon aglalo iti bagas a namiduan a nakapaayan iti La Union iti Rice Achiever Award. Naipaay pay nga 55% dagiti agob-obra ket mannalon ken mangngalap. Idi 2016 ket 471,547 a turista iti nagpasiar iti probinsia.
Indauloan ni Bokal Manuel Victor “Mannix” R. Ortega Jr., presidente ti Liga ng mga Barangay-La Union Chapter, ti panangipaay iti suporta para iti sirmata ni Gobernador Pacoy agraman iti suporta para iti met kapisi ti pusona a ni ABONO Party-list Representative Vini Nola A. Ortega. Ti gobernandor ken mammanday-linteg ket agtintinnulong tapnu agbuangay iti Agri-tourism iti probinsia.
Ti nasao a kongreso ket inatendaran iti 1,328 nga opisial ti barangay iti La Union. Datoyen iti kadakkelan a bilang iti delegado a nakipartisipar iti napalabas a 10 a tawen. ISRAEL O. RUDIO, Provincial Information and Tourism Office-La Union / ABN