Agtutubo iti Ilocos Norte nagkaykaysa kontra droga

June 4, 2017 Provincial

LAOAG CITY – Nagkaykaysa dagiti agtutubo iti Ilocos Norte a nagparada itay nabiit tapno iwaragawagda ti nainget panangkontrada ti panagusar ti maiparit a droga ken nasapa a panagsikog dagiti padada nga agtutubo iti probinsia.
Kabayatan ti pannagnada iti Vintar Road nga agturong iti Marcos Stadium iti Laoag City, iggem dagitoy nga agtutubo ti nadumaduma a karatola a nakaisuratan dagiti problema a kayatda a solbaren wenno paksiaten kas kadagiti sumaganad: “teenage pregnancy” (nasapa a panagsikog); “illegal drug addiction” (panagusar ti maiparit nga agas); ken “bullying” (panangsursuron).
Segun kenni Weenter Ventura, agdama a mangidaulo ti Ilocos Norte Youth and Development Office (INYO), kameng ti Sirib Ilokano Kabataan Association (SIKA) dagiti agtutubo a nakiparada kas paset iti pannanglagipda ti maikatlo nga anibersario ti nasao a gunglo dagiti amin nga agtutubo iti Ilocos Norte.
Kalpasan ti parada, naisayangkat ti maysa a taripnong tapno maplano dagiti umiso nga addang tapno masolbar dagiti tallo a kangrunaan a problema dagiti agtutubo iti probinsia.
Kinunana ni Ventura a masapul nga aggarawda iti kabiitan a tiempo tapno masolbar dagiti problema ti agtutubo iti probinsia babaen ti tulong dagiti opisiales ti gobierno.
Kiniddaw pay ni Ventura ti panagkameng dagiti amin nga agtutubo iti SIKA tapno napigpigsa ti boses ti gungloda.
Iti agdama, agdagupen ti 1,500 nga agtutubo ti kameng ti SIKA. Cherry Joy Discaya-Garma/PIA-Ilocos Norte / ABN