Smoking ban sa Pilipinas, sakop kahit banyaga

LUNGSOD NG DAGUPAN – Ang smoking ban, alinsunod sa executive order na nilagdaan ni Pangulo Rodrigo Duterte, ay saklaw hindi lamang mga Pilipino kundi pati na rin mga banyagang naglalagi sa bansa.
Ayon kay Francisco de Vera Jr., isang nurse mula sa Department of Health (DOH) regional office, ang mga banyaga ay maaaring hulihin kung sila’y maninigarilyo kahit saan maliban sa designated smoking areas (DSA) na kabilang sa Executive Order (EO) No. 26. Aniya, ang mga hotel na tinutuluyan ng mga banyaga ay kinakailangang maglagay ng DSA kung saan lahat ay maaaring manigarilyo na hindi aarestuhin.
Ang mga DSA ay kinakailangang 10 metro ang layo mula sa doorways at exits ng bawat hotel.
Ang mga banyaga ay hindi maaaring manigarilyo sa kanilang mga hotel rooms dahil kapag nakita, ang mga banyaga at ang may-ari ng hotel ay may pananagutan sa paglabag ng EO No. 26.
Ang parusa sa mga lumabag ay hindi bababa sa P500-P1,000 para sa unang paglabag; P2,000-P5,000 para sa ikalawang paglabag; at P5,000-P10,000 para sa pangatlong paglabag.
Sinabi pa niya na mas mataas ang ibibigay na parusa sa mga tindahan o establisimyento na nagtitinda ng sigarilyo sa mga menor de edad mula 13 hanggang 17 taong gulang.
Ang mga lumabag ay papatawan ng multa mula P100,000 at pagkakulong ng isang taon para sa unang paglabag at P200,000 na multa at dalawang taong pagkakulong para sa ikalawang paglabag.
Ani De Vera, namumuno sa information drive ng EO No. 26, na mas mabuting huwag na lang manigarilyo kaysa mahuli sa paglabag ng Anti-Smoking Law.
Ayon pa sa kaniya, mapapahaba ang life span ng isang tao na mahigitan ang 70-taon na karaniwang life span ng mga Filipino kung hindi maninigarilyo. LVM/PNA / ABN

Amianan Balita Ngayon