Arbis iti kalgaw

Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga amammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo.

Kumusta kayo metten Kakayong? Unayen a bang-ar ti rikna iti impaayna nga arbis, Kayong Angkuan. Nupay apagdalepdep ti tapok, umdasen a mangpasantak ken mangpabang-ar rikna ti Ina a
daga a nabisibisan a nabayagen a gumaw-gawawa iti arbis ni karayo.

Dagiti mula, masetas man ken ania a naitukid iti barukong ni Ina daga, simmantak nagbukar ti rikna ta nabayagen a di nakaraman arbis ti biag a kunada.

Umuna nga arbis iti panagsina ti Palayopoy amian ken kalgaw, Kayong Angkuan. Ania itan daytoy nga intay malawlawat? Ugalinsa ti naarbisan a kunada.

Anian a nagimas rikna ta nagmayat a lang-aben sumngaw ayamuom iti natoduan a daga. Dita batugmo a langit, Kayong Angkuan, nagarbis Arbis iti kalgaw kadi met? Talaga a saanen a mapogtuan ti panawen.

Pagamuan lattan ta agtodo nangruna ditoy batugmi a langit, Kayong. Agtudo lattan no makalagip. Mapag-padaanan pay laeng ti kalgaw wenno Semana Santa nga isu ti pannaka-sentro ti makuna a kalgaw.

Ngem ditoy siudad ti pino, dandani saanmi a marikna ti kalgaw ta adda pay dagiti panawen nga agtudo iti Domingo Ramos a kunada.

Adun ti lugar a maipadpadamag a mapaspasarandan ti epekto ti El Nido a kunada. Nagabbaten dagiti karayan, waig ken baresbes. Ania ti puon ken gapu amin dagitoy?

Iti sirmata ken tagtagainepmi idi mangrugin nga ammotayo ti agarapaap ken mangsirmata iti masakbayan, Kayong. Adu pay dagiti makuna a kabakiran ken uray ditoy siudad ti Pino.

Umuna a nadap-awan tayo daytoy a siudad liman a dekada ti napalabas, mil nueve sientos setentay uno (1971) idi damo a mabaddekanta ti daga ti siudad.

Malagipko la unay idi tay botelya a kargaam iti danum nga iparabawmo laeng iti lamisaan, no madanun ti agsapa, kasla kagapgapuna iti freezer ket medio nag-yelo pay ti danum.

Kasta ti kalamisna idi Kayong Angkuan iti ayanko a batug ita ditoy Dominican- Mirador. Adu pay laeng ti nakatakder a pine tree ket iti naminsan nga innak panagpasiar iti kunkunada a Lourdes Grotto, matan-awam ti napuskol pay laeng a ka-pine tree-an, laud, daya, abagatan ken amianan, napuskol pay laeng ti kaykayo.

Iti laeng mismo pay a sentro ti siudad ti pakakitaam iti adu a pasdek ken awan pay laeng dagiti agkakatayag a pasdek.

No daytay sumrek kami iti trahabomi iti karinderia iti parbangon, kumter amin a di rumbeng a kumter a kunada agraman daydiay-hahahaha.

Kasta kalammin idi. Adu ti nadandanun ta a siudad ken lugar ngem daytoy siudad ti Baguio ti intay nagustuan ket kinunkunak iti sirmata ken tagtagainepko, daytoy a lugar ti kayatko a pangbangonan iti pamiliak.

Sipud idin, inkagumaak ti nagarapaap ken nangsirmata iti biagko. Ket kaasi ti Apo, Kayong Angkuan, ti nasged a tarigagayko ket binuyogan, pinatgan ti Dios Apo a manakabalin amin.

Isu nga ita, no innak sublian ti napalabas, agsainnek man toy riknak ta nagdakkelen ti nagbalbaliwan ti aglaw-law. Dagiti nakangayngayed idi a kayo nga inka makita ita ket pasig metten a napinturan a pasdek, isu nga imbes a makapabang-ar rikna nga angot-pine tree nga inka malang-ab no inka ag-jogging idiay burnham park, asuk metten nga impugso dagiti lugan nga agsasallupang nga agpapan bigbigat pay laeng.

Ala, Kakayong, kasta pay ta naimasan tayo manen. Babayoooo, tsuptsup, muahmuah!