Bagong alituntunin sa night market, itinakda ng lungsod

October 9, 2017 Metro BLISTT

Kamakailan ay ipinagbawal ng Baguio City Market Authority (BCMA) ang pagluluto sa buong kahabaan ng night market sa Harrison Road dahil sa ilang paglabag sa kalinisan at sanitasyon ng mga food vendors.
Ayon kay Councilor Leandro Yangot, chairman ng market, trade and commerce and agriculture committee, ang kalinisan at sanitasyon ay matagal nang sinasabi ng BCMA subalit hindi tumugon ang mga food vendors. Dahil dito ay hindi na sila pinayagang magluto sa lugar.
Sa pakikipagpulong ng mga food vendors kay Mayor Mauricio Domogan at health services office ay babalangkas ng alituntunin para sundan ng mga food vendors.
“We want to give you (food vendors) livelihood but we also expect you (food vendors) to cooperate and comply with the sanitation requirements of the city,” pagdidiin ni Domogan.
“Don’t feel bad if there will be sanitary inspectors who will check your area because the city wants to protect the health safety of the people,” dagdag ng mayor.
Tinitingan ng pamahalaang lungsod na ayusin ang lugar para sa kaginhawaan at kaligtasan ng lahat ng vendors at ng publiko dahil patuloy na umaani ang night market ng popularidad mula sa domestic at foreign tourists.
Kumikita ang night market ng nasa P1.5 milyon bawat buwan para sa gobyerno.
Samantala, upang mapagbigyan ang daan-daang walk-in at interesadong vendors sa night market ay nasa proseso ng pagsasaayos sa parking spaces sa Perfecto Street ang gobyerno ng lungsod.
Sa kabila ng malaking bilang ng sumasalungat sa panukalang extension ay napagdesisyunan ng Baguio City Market Authority (BCMA) na ituloy ang plano kabilang ang Perfecto Street na maging night market.
May 160 vendors ang mapagbibigyan sa extension area na may pare-parehong espasyo na ookupahin ng night vendors sa Harrison Road.
Ihahayag ng BCMA ang availability ng karagdagang slots sa mga interesadong market vendors sa oras na makumpleto ng City Engineering Office ang sukat ng mga espayo na ipapaupa at ang paglalagay ng kaukulang lighting fixtures sa nasabing extension area.
Samantala, ang plano ng lungsod na ilipat ang aktibidad sa night market sa Melvin Jones Football Grounds ay pinag-aaralan pa.
Binigyan-diin ni Mayor Domogan na sa oras na matapos ang plano ay magiging libre ang Harrison Road sa pagsikip ng trapiko, mas ligtas para sa vendors at mga mamimili at magiging kaaya-aya pa sa publiko.
Inatasan ni Domogan ang city engineer’s office at city buildings and architectures na magtulungan at tapusin ang plano upang matapos na ang estimated budget para sa nasabing proyekto. ABN