Bilang ng mga nahuhuling naninigarilyo sa Baguio, tumaas

March 10, 2018 Metro BLISTT

Tumaas ang bilang ng mga naaaktuhang naninigarilyo at nagtitinda ng sigarilyo sa lungsod.
Ayon sa ulat ng Public Order and Safety Division (POSD), malaki ang itinaas ng mga nahuli nilang lumalabag sa Ordinance 34 series of 2017 o Smoke-free Baguio Ordinance na mula sa 88 katao noong Enero ay naging 219 mula Pebrero hanggang sa unang linggo ng Marso.
Ayon kay Joel Belinan, POSD senior officer, karamihan sa mga ito ay nahuli sa People’s Park at Harrison Road.
Aniya, halos nag-triple ang bilang ng kanilang nahuli bunsod ng nakaraang pagdiriwang ng Panagbenga.
Sinabi rin ni Belinan na paiigtingin pa nila ang paghuli sa mga pasaway na nagtitinda at naninigarilyo sa lungsod. Bukod pa rito ay nakikipag-ugnayan sila sa mga pulis para huliin ang mga lumalabag sa naturang ordinansa.
Ang mga nahuhuling lumalabag ay pinapatawan ng karampatang parusa. Ang mga naaktuhang naninigarilyo sa pampublikong lugar ay pinagmumulta ng P1,000  habang P2,000 naman sa nagbebenta para sa unang opensa.
Sa second offense ay P2,000 sa naninigarilyo at P3,000 sa nagbebenta. Sa third offense ay P3,000 at maaaring makulong ng tatlong buwan sa desisyon ng korte para sa naninigarilyo habang P5,000 naman sa nagbebenta na maaari ding makulong sa desisyon ng korte at kasama na ang pagbawi sa kanilang business permit. MARK PAUL K. PERALTA, UB Intern / ABN