BIR MANGANGAY TI ROADSHOW KADAGITI BENEPISIO DAGITI AYBAYBAYAD TI BUIS ITI SIDONG TI EOPT LAW

May 31, 2024 Headlines

SIUDAD TI DAGUPAN, Pangasinan

Nakasaganan iti Bureau of Internal Revenue (BIR)- Region 1 a mangangay iti maysa nga information roadshow iti
Ease of Paying Taxes (EOPT) tapno isuro dagiti agbaybayad ti buis iti Rehion ti Ilocos maipapan kadagiti napateg a
paset ti EOPT Law. Kinuna ni Carmelito Caday, head iti client support unit ti BIR Revenue District Office 1 nga iti information roadshow ket naikeddeng iti Mayo 31 sadiay Sison Auditorium ti ili ti Lingayen a panggepna a mapabileg iti agbaybayad ti buis a publiko iti panangipatungpal kadagiti paglintegan ken pagannurotan maipapan iti Republic Act 11976 iti EOPT Act.

Babaen iti roadshow, ipakaammomi iti publiko maipapan iti nagduduma a paset, dagiti sirmata ken punto ti linteg. Gapu ta adu ti pagimbaganna nga mabalin a magun-od dagiti agbaybayad ti buis iti sidong iti daytoy a linteg,” kinuna ni Caday iti maysa nga interbiu. Imbagana nga iti EOPT law, dagiti panagipila ti buis, nangruna para kadagiti naklase a kas micro ken small taxpayers, ket mapasimpleto babaen iti “file-and-pay anywhere system” ken mangipalubos iti kaaduan dagiti proseso iti buis a maaramid iti online.

Kinuna ni Caday a siguraduen ti EOPT law iti kinalaka ti panagtungpal kadagiti linteg ti buis, kas iti pannakaipatungpal iti simplified tax returns, napalaka a proseso ti buis, pannakakissay kadagiti documentary requirement, ken digitalisasion dagiti serbisio ti BIR. “No malagipyo, idi Enero 2024, winaswas ti linteg iti tinawen a bayad ti panagparehistro. Dakkel a pukaw dayta ti ahensia no maipapan ti panagkolekta, ngem dakkel a bang-ar dayta para kadagiti agbaybayad ti buis agsipud ta saandan a kasapulan ti agbayad ti tinawen a registration fee a PhP500,” kinuna iti pagsasao nga Ingles.

Maysa pay, impaganetget ni Caday nga iti panagbuis ket maysa a napateg a paset dagiti operasion ti gobierno a
kasapulan iti pannakaawat ti agbaybayad ti buis a publiko. “Isu nga punpuntiriaen ti BIR a mangparnuay iti ad-adda a mangiraman nga aglawlaw kadagiti taxpayer ken panangparegta kadakuada nga agtitinnulong ken tulongan iti
gobiernotayo, nangruna ti BIR, iti panagbayad iti eksakto ken umiso a gatad dagiti buis,” kinunana. Iti rehion ti Ilocos, imbaga ni Caday a manipud Enero agingga Mayo 2024, nakakolekta ti BIR iti PhP8.9 billion, a nangatngato ngem iti nakolekta a buis idi napan a tawen, nga agdagup iti PhP7.8 billion. Imbagana nga iti roadshow, a puntiria iti nasurok 1,000 partisipantes iti agsaknap ti Rehion ti Ilocos, ket sarungkaran ni BIR Commissioner Romeo Lumagui, Jr.

(EMSA-PIA Pangasinan/PMCJr.- ABN)