Brigada eskwela, kailangan bang iasa sa mga magulang?

May 21, 2017 Editorial

Bago sumasapit ang araw ng pasukan ay nagkakaroon ng paglilinis ang bawat eskwelahan sa buong bansa na kung tawagin ng Department of Education ay “Brigada Eskwela” ito ay isang paraan ng eskwelahan upang ayusin, kumpunihin ang mga sira ng classroom, upuan, pisara, pintuan at iba pa.
Ngunit may ilang katanungan ang ilang mamamayan, kailangan bang iasa ang pagsasaayos ng eskwelahan pero may pondo namang nakalaan sa brigade eskwela? Saan napupunta ang mga donasyon ng bawat magulang at iba pang indibidwal na nagbibigay sa mga eskwelahan ng tulong?
Sa paliwanag ng DepEd Cordillera, ang pagbibigay ng donasyon na ayon sa kanila na galing sa puso ay isang masasabing boluntaryo at pati ang mga tumutulong sa pagsasaayos at pagkukumpuni sa mga nasira sa mga nagdaang taon gaya ng mga pulis, magulang, estudyante at iba pang mga organisasyon ay matatawag na boluntaryo.
Hindi raw kailangang manghingi ang mga eskwelahan o guro sa mga tao o organisasyon upang tustusin sa brigada dahil may nakalaang badyet ang DepEd sa mga ganitong aktibidad.
At kung mayroon mang magbigay, ito ay maaaring tulong o donasyon na bukal mula sa mga nagbibigay at hindi rin masasabing iniaasa ang brigada sa mga magulang dahil sila mismong magulang ay kusang nagsasabi sa mga guro na tutulong sila upang maging maayos at malinis ang eskwelahan na papauskan ng kanilang mga anak.
Tama rin ang puntong dapat ding tumulong ang mga magulang at huwag iasa sa mga guro o eswkelahan ang pagsasaayos ng bawat paaralan, subalit sa parte naman ng DepEd dapat din na suklian nila nang maayos at kwalidad na pagtuturo sa mga bata upang maihanda ang bawat bata sa mas mataas na antas ng edukasyon.
Tama rin na dapat malinis at maayos ang eskwelahan o ang kapaligiran ng paaralan upang maiwasan ang pagkakaroon ng sakit ng bawat bata dahil kapag malinis at maayos ang kapaligiran nagiging disiplinado ang bawat isa. TFP