‘Cash for work’ dakkel a tulong kadagiti marigrigat

Provincial

Para kadagiti umili iti Ilocos Norte, dakkel a tulong ti ipapaay kadakuada ti “cash for work program” manipud iti Department of Social Welfare and Development (DSWD).

Saan la ngamin a makatulong daytoy a programa a mangtagiben iti kinadalus iti aglawlaw kalpasan ti idadalapus ti bagyo wenno kalamidad ngem ketdi makaited pay daytoy ti nayon a pagsapulan dagiti umili.

Maysa ni Mrs. Judith Guarino, taga Barangay Gabu Norte, Laoag City, Ilocos Norte, kadagiti 600 nga umili a naudi a nabenipisiaran ti “cash for work” manipud iti 10 a barangay iti Laoag City.

Immawat ni Mrs. Guarino ti P1,050 a tangdanna a nagtrabaho iti uneg ti lima nga aldaw iti barangayda. Nagdalus isuna kadagiti kanal; ken nagsagad iti igid ti kalsada ken karayan.

“Makatulong kadakami nga agtagibalay daytoy a “cash for work program” ngamin uray kaskasano adda met bassit a masapulanmi para iti gastosenmi ti uneg iti balay,” kinuna ni Guarino.

Nagyaman ni Guarino kadagiti opisiales ti probinsia nangruna iti opisina ti Provincial Social Welfare and Development Office (PSDWO) gapu ta maikaduan a daras nga immawat ti “cash for work program.”

Kinuna met ni Jennelyn Clemente, agnaed iti Barangay 34-B Gabu, Laoag City ken maysa pay kadagiti nabenipisiaran ti “cash for work, a regular koman a mayimplementar ti nasao a programa tapno adda regular a pagsapulan dagiti umili, ken tapno agtultuloy ti pannakataming ti kinadalus ti aglawlaw iti lugarda.

Maikadua metten a daras a napili ni Clemente a kas benipisario ti “cash for work program.”

Dagiti lumugar iti 10 a barangay iti Laoag City, Ilocos Norte a pakaibilangan ti Barangays 32 B La Paz; 33-B La Paz; 32-C; 32-A; 33-A; Caoacan; Barangay 1; 34 A Gabu; 34-B Gabu Norte; ken 35 Gabu Sur; ti kauddian nga umili iti probinsia a nabenipisiaran ti “cash for work.”

Kiniddaw ni Gobernador Imee Marcos iti opisina ti DSWD ti pannakaipaay ti “cash for work program” iti Ilocos Norte tapno nadaras ti pannakadalus ti aglawlaw ken pannakasimpa dagiti sumagmamano nga imprastraktura a dinadael dagiti limmabas a bagyo iti probinsia.

Nagbinnuligan met da Ilocos Norte PSWDO Lilian Rin ken Estrella Sacro, agdama nga Environment and Natural Resources Officer (ENRO) iti Ilocos Norte, nga insagana dagiti masapul a dokumento a maisubmitir ti DSWD tapno maikkan ti naan-anay a pundo para iti nasao a programa.

FREDDIE G. LAZARO PIA-1/ABN