GUMIL Filipinas 2019 inatendaran ti Ilokano a mannurat

May 11, 2019 Headlines

LUNA, Apayao – Umabot ti 200 a mannurat ken agiwarwarnak nga Ilokano ti nagtitipon para iti annakaisayangkat ti maika-51a nailian a komperensia dagiti kameng ti Gunglo Dagiti Mannurat nga Ilokano iti Filipinas (GUMIL Filipinas) a napasamak iti Apayao Eco- Tourism and Sports Complex, San Gregorio, Luna, Apayao idi Abril 26-28.
“Gumil Filipinas, Dana ti Panagrang-ay ti Kultura ken Literatura Ilokano,” ti tema ti nailian a komperensia ti GUMIL Filipinas ita a tawen a naawagan ti Dap-ayan 2019.
Iti uneg ti tallo nga aldaw a panagtitipon dagiti mannurat, naiyadal no kasano ti panagsurat ti daniw, panagsurat  ti ababa a sarita, gramatika ti Ilokano a lenguahe, estraktura ti lenguahe nga Ilokano, panagsurat ti drama para iti radio, ken social media.
Karaman kadagiti nagsarita iti komperensia da Cles B. Rambaud, mabigbig nga Ilokano a mannurat ken agdama a managing editor ti Bannawag; Daniel Nesperos, maysa a premiado a mannaniw; Joel Manuel, premiado a mannurat ken agdama a prinsipal iti DepEd Ilocos Norte; Luvimin Aquino ken Lety A. Aquino; ken Freddie G. Lazaro, agdama nga Assistant Regional Director ti PIA Region 1.
Segun kenni Vilmer Viloria, agdama a Presidente ti GUMIL Filipinas, tinawen nga isaysayangkat ti gunglo ti panagtitipon dagiti mannurat ken agiwarwarnak nga Ilokano tapno maadal dagiti dadduma pay a wagas para ti panangpadur-as iti lenguahe nga Ilokano ken ti literatura Ilokana.
Kabayatan iti komperensia, kinuna ni Viloria a naipasagepsep kadagiti mannurat nga Ilokano ti kinapateg ti panagusar iti umiso a sarita ken pannakanayon ti adal pakaseknan iti panagsurat iti libro, danim, drama, sarita, damdamag, social media ken dadduma pay.
Naitampok pay iti nailian a komperensia ti pannakapadayaw dagiti nangab-abak iti nadumaduma a salip ti panagsurat ken ti pannakapili dagiti baro nga opisiales ti Gumil Filipinas 2019-2021.
Indauluan ni Remy N. Albano, agdama a bise-gobernador ti probinsia ti Apayao, dagiti nangabak iti eleksion para kadagiti baro nga opisial ti gunglo a napasamak idi maudi nga aldaw ti konbension.
 
FGL-PIA1/PMCjr./ABN