Botosen Kayong?

May 6, 2019 Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabaranggayan, kakayong, gagayyem ken saan nga amammo.

Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo. Kumusta kayo metten Kakayong? Botosen, Kayong.

Ania ngay, addan napilim kadagiti kandidato kayat na ti agserbi kanu iti lugarda? Bayat a sursuraten tayo ditoy a kolum nasurok la bassiten a makalawas, botosen.

Araramiden amin a kabaelanen dagiti kandidato iti nagduduma met a posision kas iti isigud, kabagian, kumare wenno kumpare da amin a masabat da.

Hay, ania la ketdin nga agpayso ti biag ni pulitiko. Nagduduma a pamuspusan wenno istratihiya ti aramiden dagiti kandidato ken supporter dagiti kandidato ita a manu laengen nga aldaw, makeddeng dan.

Kuna met dagiti dadduma, aramiden da kanu amin a kabulastugan tapno maawis da laeng ti imatang ken rikna dagiti botante, narugit man wenno nadalus a wagas.

Ditoy ayan mi, adu latta ti sulpeng a supporters wenno campaigners da ta uray dagiti saan a mabalin wenno bawal a pagikkan da iti tarpaulin wenno posters dagiti kandidato da.

Adda met ti kampania ti komelek a mabaklas dagitoy a posters. Adda man nakasarsarita tayo maipanggep kadagiti campaign materials nangruna kadagiti tarpaulin, asinunto ti agikkat kadagita inton malpas ti eleksion.

Perhuisio man daytan kuna met tay nakasarita mi a barangay officials. Dakaminto manen ti agikkat kunana.

Adda met tay nagkuna a sakbay ti eleksion, isu kanu ti agikkat ta adda pangusaranna. Talaga nga adu ti parikut. Adda met dagitay agtatagay nga agbibinnulatsing. Adu man kanun ti agungar kadagiti nabayagen a natay tapno agbotos laeng.

Wen, Kayong Angkuan. Adda dagiti pasamak a kastoy. Dagitay sibibiag, saan da a masarakan ti naganda iti listaan dagiti botante idinto ta adda dagiti nabayagen a natay ken manun a tawen a di nakabotos ket adda pay.

Iti kallabes a barangay elections, awanen nagan da ngem nagbotos da laeng tallo a tawen ti napalabas wenno presidential elections. Asino ngay ti pabasolen tayo iti daytoy?

Botosen Kayong, ngem dikam pay la nakapili ken Sofing iti botosan mi. Manipud senator agingga iti sangguniang panglungsod. Masapul ngamin nga amirisen wenno tingitingen a naimbag ti kinatao ti maysa a kandidato.

Ti nagtaudan na a pamilia wenno family background a makuna. Ti track record na kas nabotosan nga opisyal iti kallabes no reelectionist daytoy.

Ania dagiti platapormana? No agsubsubli, naaramid na ngata wenno natungpal dagiti karina idi? Kangrunaan ti amin, saan kadi a sumrek laeng iti simbaan wenno kapilia sakbay ti election? Adu dagiti nasken pay la nga aramiden tayo sakbay a pilien tayo ti maysa a kandidato.

Aaan a gapu ta gayyem mo wenno kanayon nga agpakape ket isunto ti piliem. Laglagipen tayo koma, kailian, kayong, no nagbiddut tayo iti panagpili tayo, agtuok tayo iti tallo a tawen.

Isu nga amirisen ken adalen tayo koma a naimbag ti maysa a kinatao ti maysa a kandidato ta iti apagdarikmat a panagbiddut tayo, tallo tawen tayo met nga agtuok.

Ala, Kakayong kasta pay ta naimasan tayo manen.