Kailan uli natin matutunghayan ang pagtatanghal ng Panagbenga?

Editorial

Mahigit dalawang dekada nang nagbibigay kasiyahan ang Panagbenga o Flower Festival ng Baguio hindi lamang sa mga residente ng lungsod kundi sa mga daan-daang libo na bisita at turista – kapuwa banyaga at lokal. Sa tuwing darating na ang buwan ng Pebrero hanggang Marso ay sabik ng inaantabayan ng marami ang pagtatanghal ng mga street dancing at ang pamoso at grandiyosong mga parada ng flower floats na siyang pinakatampok na aktibidad na pinapanood ng buong bansa maging ng buong mundo.

Mula nang unang pagtatanghal hanggang sa kilalanin na ang Panagbenga na isa sa pinakaskat na pista sa buong mundo ay taon-taon na itong pinaghahandaan ng maraming tao, na kalimitang nagiging sanhi ng pagdagsa ng napakaraming bisita na dulot nito’y matinding pagsisikip ng trapiko at nag-iiwan ng karagdagang basura ng lungsod. Ngunit sa kabila ng paminsan-minsang abalang ito ang kapalit naman ay malaking halaga ang ambag sa turismo at sa kaban ng lungsod.

Sa pagdaan ng panahon, taon-taon ay mas lalong pinapaganda ng mga namumuno sa kapistahang ito ang bawat pagtatanghal upang lalong masiyahan ang mga tao at makahikayat pa ng mas maraming bisita at turista.

At sa bawat taon ay lumalaki rin ang nagiging ambag nito sa turismo at sa kabang-yaman ng Baguio na kalauna’y nagagamit para sa ikabubuti ng lungsod at pagpapahusay sa mga serbisyo publiko ng pamahalaang lungsod sa mga nasasakupan nito. Ngunit sa kasamaang-palad ay pangalawang taon nang walang pisikal na pagtatanghal ang Panagbenga dahil sa pandemyang dulot ng COVID-19, na tuwirang nagpatigil sa lahat ng paggalaw ng tao, ng trabaho ng ekonomiya, at ng turismo – isa lamang ang Lungsod ng Baguio sa mga lubos na naapektuhan.

Sa bawat pagdaraos ng Panagbenga ay marami ang nakikinabang dito, mula sa mga magsasaka ng mga bulaklak, sa mga nag-aangkat nito at mga naglalako sa palengke hanggang sa mga nag aayos ng karosa, sa bawat kalahok sa bawat uri ng pagtatanghal hanggang sa mga sponsors at hanggang sa maliliit na negosyante na kalimitang sa panahon lamang na ito bumabawi ng malaki-laking kita.

Sa isang iglap, sa dalawang taon na ay biglang naputol ang mga ito. Dahil sa lubhang banta sa kalusugan ng mga tao ay ipinagpaliban at kinansela ang mga pagtatanghal mula ng umatake ang COVID-19 noong Enero ng 2020, at ngayon nga sa ikalawang taon ay muling kinansela ito dahil na rin sa banta ng panibagong variant ng COVID-19 na B117 UK at ang tumataas pa ring bilang ng mga nahahawaan.

Noong nakaraang taon ang industriya ng turismo na nasa panahon ng kataasan sana ay nawala ang nasa PhP1.46 bilyon ayon sa pagtataya ng Baguio Tourism Office.

Ito ay base sa tourist arrivals ng taong 2019 kung saan 540,373 turista ang umakyat sa Baguio mula Pebrero hanggang Marso na may gastos sa PhP2,700 bawat tao sa bawat araw. Kung susundan ito at ang hindi muling pagdaraos ng Panagbenga ngayong taon ay maaring umabot na sa halos PhP3 bilyon ang nalulugi sa lungsod. Tunay na malaking halaga na kailangan ng lungsod.

Tunay na ang turismo ang pinakamalaking pinagkikitaan ng lungsod at mahalaga ang papel ng Panagbenga at sa bawat hindi pagdaraos nito ay napakalaki ang nawawala. Hangga’t walang katiyakan kung kailan mawawala ang panganib ng sakit at hangga’t may bakunang darating at mabakunahan ang mas maraming tao na siyang tinitingan ng gobyerno na tanging paraan upang magkaroon ng mas malayang paggalaw at tuluyan nang umusad ang turismo ay nakatengga pa rin na makapagtanghal ang Panagbenga.

Marahil habang hinihintay natin na bumalik sa dating normal ang lahat ay magkaroon sana ng ibang pagkakakitaan at naangkop na mga oportunidad upang mabuhay ang mga tao. Mas makakabuti rin siguro ang lubos na pakikiisa at pagtalima ng lahat sa mga ipinapatupad na mga tuntunin at health protocols upang sama-samang mapagpunyagihan ang kalabang sakit – dahil ang Covid-19 ang tunay na kalaban at hindi ang bawat isa.

Dahil kung hindi natin magagapi ang kalaban sa mas madaling panahon ay mananatili tayong mamumuhay na umaagapay sa bagong normal at baka matagalan pa na muli nating masasaksihan ang pagtatanghal ng grandiyosong Panagbenga. Subalit higit sa lahat ay mas mahalaga ang buhay at kalusugan ng tao kaysa mga pagsasaya.