Kaso ng leptospirosis, tumaas ng 32% sa Cordillera

August 20, 2018 Metro BLISTT

Pinag-iingat ng Department of Health-Cordillera (DOH-CAR) ang mga residente sa rehiyon sa maaaring pagkakaroon ng leptospirosis dahil na rin walang humpay na pag-uulan matapos nilang maitala ang 32 porsyento na pag-akyat sa bilang ng mga biktima nito.
Ayon sa datos mula Enero 1 hanggang Agosto 4, 2018 na ibinigay ni Nurse Geeny Anne Austria ng DOH-Regional Epidemiology Surveillance Unit, nakapagtala na  sila ng 41 kaso ng leptospirosis, mas mataas kumpara  noong nakaraang taon na may 31 kaso lamang sa parehong panahon.
Nangunguna sa may pinakamataas na kaso ng leptospirosis ang Benguet na may walong kaso at isa na rito ang namatay. Tig-lima naman ang naitalang kaso sa Baguio City at Kalinga, tig-apat sa Apayao at Ifugao, dalawa sa Abra, isa sa Mt. Province habang 12 sa naitala ay mga dayo. Tatlumput-apat o 82.9 porsyento rito ay mga lalaki at may edad na 12-66 taong gulang.
Ang leptospirosis ay nakukuha sa kontaminadong ihi ng mga hayop tulad ng daga na maaaring naihalo sa tubig at ito ay naililipat sa pamamagitan ng skin contact.
Ilan sa mga sintomas ng leptospirosis ang biglaang pagkakaroon ng lagnat, panginginig, severe myalgia o lubhang pagsakit ng kalamnan (sa mga binti at hita), conjunctival suffusion na makikita sa pamumula ng mata at rashes.
Paalala ng DOH na ugaliing magsuot ng bota kapag susulong sa tubig upang maiwasan ang pagkakaroon ng leptospirosis. Iwasan rin ang paglangoy sa baha at palaging itapon ang mga naipong tubig ulan na walang takip at ang pagkokontrol sa pagkakaroon ng mga daga sa bahay.
Sa kabilang dako, bumaba naman ang kaso ng iba pang mga sakit tulad ng acute bloody diarrhea, acute viral hepatitis, hand, foot and mouth diseases (HFMD), influenza like diseases at typhoid/paratyphoid fever. JAYB B. NGATEG, UC INTERN / ABN