Konseho ng lungsod, nagiging katawa-tawa na ba?

February 17, 2018 Editorial

Sa maraming taon na idinaraos ang “Market Encounter” na isang palamuti ng taunang selebrasyon Baguio Flower Festival o Panagbenga ay napapansin na ang usok na nagmumula dito. Usok na pinaghihinalaang may niluluto dito tuwing sasapit ang okasyon. Hindi maiwasan ng ilang malilikot ang pag-iisip na maghinala dahil sa kabila ng isang makahulugang pahayag na “parks are beyond the commerce of man”… ay pinapayagan pa ring ganapin ang ilang “piling” aktibidad dito.
Ginagawa ang “Market Encounter” sa Burnham Park at sa taong ito ay may 325 stalls na ang nakatayo at kabilang na rito ang isang carnival na naging ugat ng pagtatalo sa konseho ng Baguio. Sumobra sa mahigit 100 stalls na wala pang business permits at dahil sa pakiusap ng isang proponent ay pinayagan ito, siyempre may karagdagang bayad muli.
Dahil dito ay  nagkaroon ng mainit na diskusyon sa konseho at isinulong na ipasara ang mga naidagdag na stalls na hindi naman pinaburan ni Mayor Mauricio Domogan dahil nakabayad na ang mga ito sa Baguio Flower Festival Inc. (BFFI) at hindi sa City Treasurer’s Office.
Ang tanong ay, may karapatan ba o hurisdiksiyon ang konseho upang ipasara ang mga sobrang stalls at carnival? Sinabi ni Vice Mayor Edison Bilog na ang pag-apruba ng BFFI sa pagdaragdag at paglagay ng isang carnival sa Market Encounter ay isang insulto sa konseho at ang paghingi ng permiso ng proponent kay Mayor Domogan ay paglaktaw sa konseho.
Sinabi ni Councilor Elmer Datuin na karapatan ng BFFI na patakbuhin ang festival at pagsagawa ng bidding sa carnival na sinundan naman ni Councilor Faustino Olowan na walang kapangyarihan ang konseho na ipasara ang mga puwesto na tanging punong ehekutibo lamang ang may kapangyarihan.
Ayon kay Vice Mayor Bilog ay rekomendasyon lamang na ipasara ang ginawa ng konseho na agaran namang hindi sinang-ayunan ni Mayor Domogan.
May katuwiran sa isang banda ang tinuran ni Councilor Olowan na kung ang market encounter ay siyang pagmumulan ng hindi pagkakaunawaan at problema ay mas mabuti pang huwag na lang magdaos nito upang huwag naman masira ang imahe ng Panagbenga at ng lungsod… dahil kung hindi ito maaayos ay magmumukhang katawa-tawa ang konseho at mawawalan din ng pagkakakitaan ang maliliit na negosyante na nais lamang kumita kahit paano tuwing Panagbenga.
At kung hindi maampat ang usok ay baka maging apoy ito na lalagablab. PMCJr.