Limang taon ng Batas Militar, limang simpleng dahilan?

July 16, 2017 Editorial

Sa susunod na Lunes, Hulyo 24, 2017 ay muling haharap ang Pangulong Rodrigo R. Duterte sa bayan para sa kaniyang ikalawang “State of the Nation Address” (SONA) na taunang inaabangan ng mamamayang Pilipino lalo na ng mga mambabatas, mga opisyal ng gobyerno at mga pribadong lider ng ekonomiya, iba’t ibang industriya, kumpanya, sektor at maging ng mga mapagmasid na banyaga.
Tiyak ding hindi mawawala ang mga kritiko at bumabatikos sa Pangulo at sa gobyerno na di gaya ng nakasanayang magarbong pagtitipon ay magiging simple na lamang ito, simpleng mga Pilipinong pagkain na lamang ang ihahain, maging ang kasuotan ay hiniling maging simple rin.
Subalit ang inaasahang pag-uulat sa kalagayan at estado ng bayan sa isang taong nakaraan ay maaaring pangalawang aantabayanan lamang dahil dito maaaring ideklara ni Pangulong Duterte ang pagpapalawig ng Martial Law sa buong Mindanao at ang mga dahilan nito. Kailangang bago ang SONA ay mapasakamay na ni Pangulong Duterte ang mga rekomendasyon sa pagpapalawig ng Batas Militar sa Marawi o sa buong Mindanao (minadali kaya ito?).Inirekomenda ni House Speaker Pantaleon Alvarez ang “limang taon” na Martial Law sa Mindanao, bagaman maraming mambabatas ang sang-ayon sa pagpapalawig nito sa Marawi nang konti pang panahon ay hindi naman sila pabor sa limang taon (sa ngayon).
Bagaman walang direktang pagpabor si Duterte sa limang taon sa buong Mindanao ay nakikita na maaari siyang pumabor dahil sa kaniyang nakaraang walang alinlangang pahayag na magdeklara uli ng Martial Law kung hinihingi ng pagkakataon at kung siya’y hahamunin.
Pinaghahambing ang liderato ng mga nakaraang pangulo na matatalino subalit kulang sa puso, samantalang si pangulong Duterte ay puro puso raw at kulang sa talino. Sa kabila ng imahe ng pangulo na matapang, brusko, diretsa, palamura at mamamatay-tao ay nasasalamin ang kaniyang malambot na puso sa mga naaaping tao lalo na ang mga bata at kababaihan. At ngayon ay muling iiral ang puso dahil siya’y taga-Davao, isang Mindanaoan at naghihinagpis sa nangyayari sa kaniyang lugar na nais niyang tulungan noon pang limitado ang kaniyang kapangyarihan bilang mayor–ngayon na mas malakas at malawak na ang kaniyang kapangyarihan ay matutulungan na niya nang lubos.
Limang simpleng dahilan ng pagpapalawig ng Batas Militar. Una ay ibangon at ipakilala muli ang Mindanao bilang maharlika at lupang pinagpala at hindi baluwarte ng terorismo at bandido. Pangalawa ay linisin sa droga at rebelde ang bansa (dahil iniuugnay na sa droga ang mga rebelde, maging ilang politiko at opisyal). Pangatlo ay linisin at simplehan ang pamamalakad sa gobyerno. Pang-apat ay palakasin at bigyan ng magandang buhay ang kasundaluhan ng Hukbong Sandatahan ng Pilipinas at PNP, katunayan dito ang panimulang karagdagan sa sahod at ang mainit na pagtrato ng Pangulo sa kanila. Ang maaaring panlimang dahilan ay gawing sentro ng Pilipinas ang Davao, katunayan dito na ginawang pangalawang opisyal na tanggapan ng Pangulo ng Pilipinas ang kaniyang tirahan sa Davao City.
Suntok sa buwan ba ang mga dahilan o napakasimple dahil karamihan ng pangunahing opisyal ng kaniyang gabinete at gobyerno ay kaibigan, dating militar at kaalyado na mga taga-Mindanao? Simple nga lamang ang solusyon—Batas Militar—ito ay kung lulusot. PMCJR.