Magnanakaw, ibinalik ang cellphone sa may-ari

November 18, 2017 Police Patrol

Isang magnanakaw na diumano’y tumangay ng cellphone ng isang 21-anyos na guro mula sa kaniyang bulsa habang abalang inilalagay ang kaniyang payong sa backpack sa kahabaan ng Session Road, Baguio City, hapon ng November 14, ang nagbalik ng dinukot na item sa may-ari.
Huminto diumano ang biktimang si Gabriel Rulloda de Guzman, guro sa isang kilalang money transfer firm sa kahabaan ng Session Road, ibinulsa ang kaniyang Vivo 5S cellular phone at inilalagay ang payong sa kaniyang backpack nang dukutin ang kaniyang cellphone ng suspek na Bryant Goyagoy Ambola, 35 anyos, foreman, mula Tabuk City, Kalinga.
Nang mapansin ng guro na nawawala ang kaniyang cellphone, agad na hinanap ang suspek at ibinalik naman ang kaniyang cellphone.
Napansin naman ng mga nagpa-patrol na pulis ang insidente at agad na hinuli ang suspek sa police station upang masampahan ng kaso.
Samantala, nahuli ng bystanders ang isang magnanakaw matapos nitong mabigong nakawan ang isang tindera sa Camp Allen, gabi ng Martes.
Dinala ang suspek na kinilalang si Raymond Mabitazan Juanbe, 25, jobless, mula Camp 6, Tuba, Benguet, sa isang police station ng mga bystanders na nakahuli sa kaniya matapos nitong subukang tangayin ang bag ng biktimang si Island Nidera Maristela bandang 7:20pm ng November 14.
Naglalakad pauwi diumano ang biktima matapos ang buong maghapong pagbebenta sa palengke nang biglang tinakpan ng suspek ang kaniyang bibig mula sa likod at gulpihin ang biktima habang pilit na tinatanggal ng suspek ang kaniyang bag na naglalaman ng P1,740 na kita nito na nakabitin sa kaniyang leeg.
Bigong makuha ng suspek ang bag nang magpara ng taxing dumaan ngunit nahuli siya ng mga bystanders.
Dinala ang suspek sa police station at mahaharap sa kaso, ayon sa pulisya. ACE ALEGRE