Mga Muslim sa Pangasinan, makikipagtulungan sa awtoridad

June 11, 2017 Provincial

LUNGSOD NG DAGUPAN – Nangakong palalakasin ng 80 pinuno, kabilang ang mga Imam at Ustadz na konektado sa Pangasinan Muslim Association, ang kanilang hanay upang mapigilan ang anumang kaguluhan lalo na ang magmumula sa Mindanao at magtatago sa Pangasinan, sa kanilang pagsasama-sama sa tanggapan ng Pangasinan Police Provincial Office sa Lingayen noong Huwebes.
Sa kanilang dyalogo sa mga opisyal ng PNP sa pamumuno ni Provincial Director Senior Superintendent Ronald Oliver Lee ay nangako ang mga pinuno ng Muslim na agad iulat ang presensiya ng mga terorista mula Mindanao kahit pa mga kamag-anak nila ito.Ang mga dumalo sa dyalogo ay mula sa Muslim communities sa Pangasinan na nagpahayag ng kalungkutan sa mga nangyayari ngayon sa Minadanao, lalo na sa Marawi City kung saan patuloy pa rin ang bakbakan sa pagitan ng mga tropa ng gobyerno at grupo ng Maute.
Sa pagtitipon ay nanawagan si Datu Alan Maasir, presidente ng lokal na Muslim Association, sa kanilang mga miyembro na huwag mag-imbita ng mga kamag-anak sa Mindanao partikular ang mga sangkot sa krimen lalo na sa terorismo.
Ito ay upang masigurong huwag umabot sa Pangasinan o sa anumang lugar sa Luzon ang kaguluhan sa Mindanao, ani Maasir.
Samantala ay sinabi ni Lee na ang dyalogo ay dahil sa pagsisikap ng mga Muslim mismo na naghahangad ng kapayapaan hindi lamang sa kanilang komunidad kundi maging sa Mindanao kung saan sila galing.
Habang umaapila sa mga terorista na huwag pumunta sa Pangasinan ay nangako ang Muslim leaders na magtutulungan at mag-oorganisa sila upang sinumang bagong mukha sa kanilang komunidad ay agad iuulat sa kapulisan.
Gayundin ay inilahad ni Lee ang isang plano na mag-organisa ng mga Muslim sa Pangasinan na magiging responsible sa pangangalaga ng kanilang sariling komunidad at sa koordinasyon ng mga opisyal ng barangay at pulis. ABN