Pagbaba ng krimen sa Baguio, iniulat ng BCPO

April 25, 2017 Latest News

LUNGSOD NG BAGUIO – Inihayag ng Baguio City Police Office (BCPO) ang pagbaba ng krimen sa lungsod ng Baguio noong ika-24 ng Abril 2017 sa city hall.
Ayon sa BCPO, ang isinasagawa nilang crime prevention ay malaki ang naiambag para bumuti ang sitwasyong pangkapayapaan sa lungsod.
Sa tulong ng iba’t-ibang stakeholders sa pagpapatupad ng anti-criminality plans at stratehiya ay nagresulta ng pagbaba sa kaso ng krimen.
Ang naitalang kabuuan ng crime volume base sa police blotter mula Enero hanggang Marso ngayong taon ay nasa 944 krimen na 54 porsyento ang ibinaba kumpara noong nakaraang taon na 2,043 na kaso ang naitala sa parehong panahon.
Ang index crimes ngayong unang quarter ng taon ay nasa 268 na kaso na may 71 porsyentong pagbaba mula sa 923 na krimen na naitala noong 2016.
Ang non-index crimes ay nasa 676 na kaso na 76 porsyento ang ibinaba kumpara noong unang quarter ng 2016 na 2,610 ang naitala.
Nagkaroon din ng pagbaba sa kaso ng mga pagnanakaw na may 467 kaso o 79 porsyentong pagbaba kumpara noong 2016 at robbery na bumaba ng 80 porsyento mula 132 na kaso ay naging 26 na kaso at carnapping na bumaba sa isang kaso mula sa limang kaso ng unang quarter ng 2016.
Sa physical injuries naman ay bumaba mula 180 na kaso hanggang 96 ngayong taon o 47 porsyentong pagbaba.
Samantala, ang average index crime clearance efficiency ng unang quarter sa taong ito ay naitalang nasa 78 porsyento na tumaas ng 46 porsyento mula sa nakaraang taong may 32 porsyento.
Ang average index crime solution efficiency ay naitala sa 62 porsyento na tumaas kung ikukumpara sa nakaraang taon na may 27 porsyento.
Ang pagbaba sa index crime volume at pagtaas ng CSE at CCE ay dahil sa pagpapatupad ng pinaigting na Lambat Sibat at paggamit ng Geographic Information System Based Crime Analysis (GIS-BCA) sa aktibong pagdedeploy ng mga pulis sa mga kritikal na lugar base sa crime clock.
Ang paggamit ng motorized response team ay may malaking epekto dahil sa presensiya ng mga pulis sa grassroot level at ang increased cross border patrol kung saan mayroong pulis assistance sa mga lugar na hindi kayang i-cover ng mga patrol vehicles.
Sa patuloy na pakikipagugnayan sa local government unit (LGU) at ibang mga sektor ay nagbibigay ng mahalagang parte sa kabuuang seguridad ng lungsod. Liezel Eunice Callejo, UC Intern