Pagtayo ng multi-level parking, prayoridad sa Baguio

Inilahad ni Mayor Mauricio Domogan na nais niyang bigyan ng proyoridad ang pagtatayo ng multi-level parking upang malunasan ang lumalalang problema ng lungsod sa bigat ng trapiko.

Sa kabila ng maraming eksperimento nang ipinatupad mula sa coding at rerouting ay nananatili pa ring sakit ng ulo ng mga motorista at maging ng mga residente ang matinding trapik.

Ani Domogan, isang tinitignang lugar na pagtatayuan ay ang bakanteng lote ng Baguio Fire Department para magsilbing parking area ng mga sasakyan sa paligid ng city hall.

Sinabi ng mayor na kailangang gamitin ang savings sa pagsasaayos ng Baguio Convention Center upang pondohan ang 8-storey multi-level parking.

Ipinaliwanag niya na ang ipinanukalang istraktura ay magsisilbing parking area ng lahat ng mga sasakyan ng pamahalaan upang mabigyan ng espasyo ang mga lugar sa paligid ng city hall at ng magamit ng mga pribadong may-ari ng sasakyan na iparada habang may mga transaksyon silang inaayos sa iba’t ibang tanggapan ng city hall.

“Ang lokal na pamahalaan ay nagsisikap na maghanap ng angkop na mga lugar kung saan maaaring itayo ang mga istrukturang paradahan ng multi-level upang matulungan ang pag-decongest sa mga lansangan ng lungsod.”

Aniya ay patuloy na naghahanap ang pamahalaang lungsod ng angkop na mga lugar para sa multi-level parking, ilan dito ay kinabibilangan ng parking area sa Ganza at kinalalagyan ng lumang awditoryum.

Batay sa plano ng parking sa Ganza, ang rooftop ay magiging lugar ng produksyon para sa mga bulaklak at iba pang mga halaman para sa mga nais magnegosyo, recreation facilities upang tulungan ang pasilidad na mamintina para sa mga interesadong magtaguyod.

Inamin niya na ang pay-parking ay hindi isang kapaki-pakinabang na negosyo, sa gayon, kailangan na isama ang iba pang mga gawain sa pagbuo ng kita. Kapag ito ay gagawin sa pamamagitan ng isang public-private partnership (PPP) upang maakit ang mga interesadong mamuhunan na kasosyo sa lokal na pamahalaan para sa pagsasakatuparan ng nasabing gawain.

Sinabi niya na ang lokal na pamahalaan ay laging bukas sa mga suhestiyon kung paano matugunan ang mga problema sa paradahan ng lungsod at isinasaalang-alang ang magkasama sa pagpaplano at konseptwalisasyon ng pagtatayo ng mga kinakailangang multi-level na istruktura ng paradahan alinman sa pamamagitan ng PPP o anumang magagamit na lokal na pondo. ABN

Amianan Balita Ngayon